Guwahati, Naiwieng:
Ka seng Communist Party of India (CPI) ha ka sngi Ba-ar ka la pynrem ïa ka jingshah set jong ki 44 ngut ki nongbylla na Jammu & Kashmir ha New Tinsukia Railway Station ha Assam, da kaba khot ïa kane ka jingjia ka dei ka bynta jong ka rukom pynjah burom bad pyndik kaba la nang kiew ha ki jylla ba la synshar da ka BJP.
Ha ka jingpynbna ba la pynmih ha ka nongbah, ka CPI ka la kyntu ïa u Myntri ka tnat ki kam poh ïing jong ka sorkar pdeng u Amit Shah ban tuklar bad ban pynthikna ïa ka jingshngaiñ bad ka hok jong ka Riti synshar jong ki nong Kashmir kiba sah bad kiba trei ha kylleng ka ri.
Ka seng ka la ong ba baroh 44 ngut ki nongtrei ki don ïa ki kot ki sla kiba biang, hynrei la pynngat ïa ki “tang halor ka jingsuba bad ka dur” hadien ba la pynsangeh ïa ki da ki nongshong shnong hajan Hijuguri.
Hadien kata ki Pulit Assam ki la pynthikna ba ïa katei ka kynhun la set tang na ka bynta ban “pynshisha ïa ka jinglong.”Ka CPI ka la ong ba katei ka jingjia kam shym la long kaba kyrpang, da kaba kdew sha kaei kaba ka la batai kum ki jingjia ba ju jia man ka por jong ka jingshah lehbeiñ ha ki jylla kum ka Assam bad Haryana.
Ka la kdew ïa ka jingïakynad kaba dang shen ha Gurugram, ha kaba ka jingpynbna kaba bthah ban pynrung kyrteng ïa ki nongshong shnong Kashmir ka la ïoh ïa ka jingshah kynthoh.
Haba buh jingkylli ïa ki jingkynthoh ba la ju kynnoh da u Myntri Rangbahduh ka ri u Narendra Modi bad ka BJP ban pynrit ïa ka jingïapher hapdeng ka Delhi bad ka Kashmir, ka CPI ka la ong ba ka jingleh ïa ki nongtrei Kashmir ba rit paid ka pynmih ïa ka jingartatien halor ka jinglong shisha jong kita ki jingpynthikna.
Ka seng ka la pynpaw biang ïa ka jingdawa ban pyntreikam mardor na ka tnad ki kam pohïing jong ka sorkar pdeng ban ïada ïa ka hok bad ka burom jong ki nongshong shnong Kashmir kiba sah sha kiwei pat ki jaka ha India. Ki pulit ha Assam ki la ïathuh ba katei ka kynhun ba la shah kem ki kam ba ki dei na Jammu bad Kashmir bad la set ïa ki shipor na ka bynta ban pynshisha.
