Shillong, Naiwieng 20
Ka Curacao ka la long ka ri kaba rit eh ha ka jingbun briew ban ïoh rung pat sha ka FIFA World Cup, hadien ba ka la lah ban pynïakhaid khlem don bathep kol pyrshah ïa ka Jamaica ha ka step jong ka sngi Balang.
Kane ka ri ka don tang 1,56,000 ngut ki paidbah nongshong shnong, hynrei ka la lah ban leh ïa ka kam kaba phylla na ka bynta ban pynsah kynmaw shirta ha ka jingïalehkai phutbol.
Ka jingïoh rung katei ka ri ka la wan ban pynpra noh ïa ka rekod ba la lah ban pynurlong da ka Iceland ha ki phra snem mynshwa. Kane ka ri ka la lah ban pynurlong ban ïoh rung sha ka World Cup 2018 bad kaba don tang 350,000 ngut ki nongshong shnong. Kumba ka paw ka Curacao ka dei ka ri kaba long shi bynta jong ka Netherlands.
Haba ïalehkai ha Kingston, ka Curacao ka la lah ban ïalehkai wat hapdeng ki jingeh, hynrei ka la lah ban ïengskhem haduh kaba kut ban ban ym ailad ban shah thep kol ha ka Jamaica bad mar ïakut ka jingïalehkai ki paidbah ki la mih sha madan ban risa bad kynhoi halor kane ka jinglah ban pynurlong.
Kumba ka paw ka Curacao ka la wan hakhmat eh ha ka CONCACAF jong ka Group-B khlem da shah rem, ha kaba ka la pynkut da kaba kamai 12 poiñ na ki hynriew sien ïakhun. Kane ka kynhun ka la jop lai sien bad ïakhaid lai sien. Katba ka Jamaica kaba la wan ba-ar ha kane ka group, ka la jop lai bad ïakhaid ar sien na ka bynta ban kamai 11 point.
Ha ki shiphew snem ba la lah, la lah ban pyni ïa ka jingkhlaiñ da ka Mexico, US, bad Costa Rica, ka Curacao ka la pyni ïa ka jingtbit ban rung sha kawei ka lympung haba heh duh ha ka pyrthei.
Ïa mynta ka Curacao ka dangap sa ïa ka bynta kaba kongsan jong ka jingpynïakap (draw) na ka bynta ka World Cup ka ban long ha ka 5 tarik u Nohprah.
