Shillong, Naiwieng 20
Ka Meghalaya Cricket Association (MCA) ka la shim ïa ka rai ban ïarap ha ka ban kyrshan ïa ka lympung ïalehkai Maitshaphrang Khasi League ban pynïaid da ka Khasi Students Union bad kumjuh ïa ka 1st Garo Hills Tribal Cricket League.
Kane ka long shi bynta ban nangpynïar bad ban lah shuh shuh ha ka ban khring ïa ki khun samla trai ri trai muluk ba kin phaikhmat sha ka jingïalehkai kriket.
Ïa kane ka lympung ka ban pynlong ha Ri Lum Garo ka dei ka jingshimti bad kitkhlieh da u Vice President ka MCA u Sengnab Momin, ha kaba u la lum la lang ruh da ka jingïalang bad ki riew ïeit ïa ka jingïalehkai kriket, ha ka 18 tarik mynta u bnai, ha kaba ki nongkitkam ki kynhun ïalehkai kriket ki la poi sha ka jingïalang ba la long ha madan ïalehkai jong ka Alotgre, Tura, ha kaba la rai ban thaw syndon ïa kawei ka komiti na ka bynta ban pyntyllun shakhmat ïa kane ka lympung.
Dei ha kane ka jingïalang, ba la pdiang bad mynjur ïa ka kyrteng jong kane ka lympung ïalehkai 1st Garo Hills Tribal Cricket League, ha kaba ïa ka sngi bad ka tarik ban sdang ban pynlong ïa kane ka lympung yn sa pynbna da ka jingïalang ka ban long ha Mendipathar.
Kumta, ka MCA ka dap shisha da ka mynsiem kaba sngewkmen bad pynpaw ïa ka jingsngewnguh ïa baroh kiba la shim lem ïa ka jingkitkhlieh na ka bynta ban rah ïa ka khubor shaphang ka jingthmu ban pynlong ïa kane ka lympung ha Ri Lum Garo, ka ban long artad kum ka jingsdang ban thang ïa u saihon u ban sa pynrhem ïa ka mynsiem ïalehkai jong ki khun samla kane ka dong ka thaiñ bad ban lah ruh ban sei madan ïa ki sap ba nylla jong ki, khnang ban ïoh ïa ka lad ban jied pat ïa ki na ka bynta ban mihkhmat ïa ka Jylla ha ki kyrdan ïakhun ba kham shalor.
