Washington, Naiwieng:
Uwei u kapten jong ki shipai suiñ jong ka US (USAF), u la kynthah ia ki nongpyniaid jong ka Dubai Air Show 2025, namar ba ki dang bteng ia ka jingpyni nam ‘Air Show’ kumba la pynbeit, watla ka la don ka jinghap bad ka jingjia ba sngewsih jong ka liengsuiñ iapom jong ka Indian Air Force, ka Tejas, ha kaba u Wing Commander, U Namansh Syal, u la khlad noh syndon ha katei ka jingjia ba sniewbok. U Captain Taylor “Fema” Hiester, uba dei u dkhot jong ka kynhun pyni nam jong ki liengsuiñ F-16 jong ka US, u la ong ba ka kynhun jong u ka la weng noh mardor na ka rukom treikam ba la buh ban leh na ka bynta ban burom ïa u Wing Commander Syal, ha kaba u la khot ïa kane ka jingleh jong ki nongpynïaid ban pynïaid shakhmat ia katei ka jingpyni nam, ba ka long kaba “kyndit” bad “bym sngewtynnad”.
“Hadien ar snem ba nga la leh ïa kane ka kam, kata ka dei kaba nyngkong eh na ka bynta ka kynhun jong ngi bad ka la wan ha shwa ka jingpyni nam ba khatduh jong ngi ha kane ka samoi ia pyni nam,” u la thoh ha ka jingthoh ba bniah ha ka rynsan ‘Instagram’.
U Hiester u la ong ba ka kynhun jong u, ka dang pynkhreh ia ka jingialehkai kaba khatduh jong kane ka samoi ha kaba katei ka jingjia ka la jia. Mar mar ki la weng noh ïa ka jingïashim bynta jongki bad ki la mih noh na katei ka jaka namar ka jingburom ïa utei u nongñiah liengsuiñ jong ka Indian Air Force uba la khlad noh.
U la pynpaw ruh ba u khmih lynti ba katei ka jingpyni nam ‘Air Show’ kan sangeh noh hadien ka jingjia aksiden kaba la wanrah ia ka jingiap briew; ha ka jaka kata, u la shem ia u nongpynbna ba u bteng “da ka jingsngewtynnad” katba ki paidbah ki dang peit ia ki jingpyni nam ia ki jingpynher liengsuiñ da ka jingsngewkmen.
