Khliehriat, Naiwieng 25
Ka Rymbai Shkenshynriah ka la pynkhreh ban aireng pyrshah ïa ka Diengshynrum SC ha ka Qualifier-2 jong ka lympung ïalehkai Super Division Football Tournament ba la pynïaid da ka East Jaiñtia Hills District Sports Association (EJHDSA).
Kane la wan hadien ba ka Rymbai Shkenshynriah ka la pynliem noh ïa ka Shilliang Umshong SC ha ka semi-final Eliminator kaba la long ha madan artificial turf Diengshynrum, Khliehriat ha ka sngi Ba-ar.
Ha kane ka jingïalehkai, ka Rymbai Shkenshynriah ka la pynliem noh ïa ka Shilliang Umshong SC da 2-0 kol. Ïa kine la thep da u Ribiang Dkhar ha ka minit 60 bad u Raplangki Lyngdoh ha ka minit 79.
Ka jingïalehkai Qualifier-2 kan long ha ka 1 tarik u Nohprah hapdeng ka Rymbai Shkenshynriah pyrshah ïa ka Diengshynrum SC ha ka por 1 baje mynsngi.
