Bengaluru, Naiwieng:
Hapdeng ka jingïaknieh ïa ki nongïalam ha Karnataka, bad ha kaba la ïathuh ba ki heh nongïalam jong ka Congress ki khmih lynti ba kin rai halor kano kano ka jingkylla ha u Myntri Rangbah shwa ka jingïalang jong ka Parliament ha ka 1tarik Nohprah, u Rahul Gandhi u la jubab ïa u Symbud Myntri Rangbah u D.K. Shivakumar hadien shi taïew shwa ka jingthmu.
Katkum ka khubor jong ka seng, u Shivakumar u la pyrshang ban ïakren bad u Rahul Gandhi ha kaba ïadei bad ki jingjia hapoh ka seng.
U Gandhi u la jubab da ka jingthoh lyngkot ha ka WhatsApp: “Sngewbha ap, ngan sa phone ïa phi.”
Kumba la ïakren hashwa, la ong ba ka jingairai kan sa long hadien ka jingïapynbeit bad ka jingïamynjurlang da baroh na ka bynta ka jingbha ka seng.
Kane ka jingkylla ka wan ha ka por ba ka Congress ka ïakynduh ïa ka jingkynthoh kaba jur bha halor ki jingkylla kiba lah ban jia ha ka jinglong nongïalam jong ka jylla.
U Shivakumar, u dang pynkhreh ruh ban leit sha Delhi ha ka 29 tarik u Naiwieng. U la pan por ban ïakynduh bad ka Sonia Gandhi, kaba la buh por ban wan phai biang sha ka nongbah ha kajuh hi ka sngi, ong ki tyllong khubor.
La ïathuh ba u Rahul Gandhi, u la ïakynduh ïa ki nongïalam jong ka Karnataka, U Priyank Kharge bad u Sharath Bacchegowda, ha Delhi.
Ki jingïakren ki kynthup ïa ka “vote chori,” ka tiar PC KEO AI ba dang shu pynmih thymmai, ka platform SIR, bad ka jinglong jingman jong ka saiñ pyrthei kaba kham jylliew ha Karnataka.
U Priyank Kharge bad u Sharath Bacchegowda ki la pan ïa kane ka jingïakynduh ban ai jingtip lyngkot ïa u nongïalam ka liang pyrshah halor ka tiar kaba pyndonkam da ka AI kaba u la thmu nyngkong eh ban pyni paidbah ha ka Karnataka Tech Summit.
U Rahul Gandhi u la kylli jingkylli ïa kitei ki arngut halor ka jingkynnoh “vote chori” ha Aland bad ka jingdonkti jong ka Chilume, ka seng treimon sngewbha kaba don jingïadei bad ki kam pynkylla ïa ki nongthep vote.
Ka jingïakynduh lang ka la neh kumba 15 minit eiei, hadien kata u Rahul u la khot ïa u Priyank Kharge na ka bynta ka jingïakynduh markhmat kaba la bteng haduh 20 minit eiei.
Katkum ki tyllong khubor, u Rahul Gandhi u la pynlong ïa ki jingïakren kiba bniah halor ka jingpynbeit ban pynkylla ïa ka bor synshar, ka jingpynkylla ïa ka kynhun Myntri kaba lah ban jia, bad ki jingkren paidbah ba dang shen ba la pynmih da ki heh nongïalam jong ka Congress.
La ong ba u sngewsih halor ka jingkyntait ban pynpaw paidbah jong u Myntri Rangbah ka jylla u Siddaramaiah ïa kano kano ka jingïateh ban ïasam bor bad pynskhem ba un pyndep ïa ka samoi treikam ba pura kaba san snem.
“Um dei ban kyntait ïa ki jingïakren ban ïasam bor ha ki jaka paidbah kumne. Ngan sa ïakren bad ki baroh arngut shen,” la ïathuh ba u Rahul u la ong ïa u Priyank, da kaba ai jingmut ïa baroh ar tylli ki kynhun ba kim dei ban pynjur ïa ka kynrum kynram.
Ki tyllong khubor ki ïathuh ba u Priyank u la ïoh phone na ka ophis jong u Myntri Rangbah ka jylla ha ka por ba u la hiar ha Bengaluru, ha kaba la khot ïa u sha Shakti Bhavan.
U la pynshai lyngkot ïa u Siddaramaiah bad hadien u la ïakynduh ïa u Symbud Myntri Rangbah ka Jylla u DK Shivakumar ha ka ïing sah jong u, ka jingbud ryntih kaba la batai da kiba bun hapoh ka seng kum ka jingkyntiew ïa u Shivakumar bad ka jingpynphaidien ïa u Myntri Rangbah ka Jylla.
U Rahul Gandhi, la bynrap shuh shuh da ki tyllong khubor, ba u angnud ban pynthikna ba ka Vote Bank jong ka Congress kan neh bad kan ym ïapra ha kano kano ka jingkylla nongïalam. Khnang ban lait na ka jingshah kynthoh na ki kynhun ba kongsan ha ka imlang sahlang, ka seng ka dang wad ïa ka lad ban pynïahap lada jia ba u Shivakumar un shah kyntiew kum u Myntri Rangbah ka Jylla.
Hapoh kane ka rukom treikam, lah ban ai ïa ka kam President jong ka KPCC bad ka kam Myntri Rangbahduh sha ki nongïalam na ki OBC, SC/ST bad ki jaitbynriew rit paid ban pynneh ïa ka jinglong ryntih ha ka imlang sahlang bad ka saiñ pyrthei.
