New Delhi, Naiwieng:
Ka Supreme Court ha ka sngi Ba-ar ka la bthah ïa ki jylla bad ki synjuk ba ki dei ban thep hapoh lai taïew ïa ki kaiphod jingbud ryntih jong ki ha ka kam kaba ïadei bad ka jingbym don ki CCTV kiba treikam ha ki thanat pulit ha kylleng ka ri.
Ka kynhun nongbishar jong u Justice Vikram Nath bad Justive Sandeep Mehta ki la ai ïa ki hukum hadien ba la ïathuh ba tang 11 tylli ki jylla ki la lah ban jubab ïa ki jingkylli ba ka ïingbishar ka la buh.
U Senior Advocate u Siddharth Dave, u Amicus Curiae ha katei ka kam, u la pyntip shuh shuh sha ka ïingbishar ba ka Synjuk ka Ri India ruh kam shym la ai ïa ka jingpynbna jong ka (Compliance Affidavit) haduh mynta ha kaba ïadei bad ki kynhun tohkit jong ka sorkar pdeng, kynthup ïa ka kynhun NIA.
U Solicitor General Tushar Mehta, uba mih na ka bynta katei ka sorkar pdeng, u la kyntu ïa ka ïingbishar na ka bynta lai taïew ban thep ïa ka kaiphod jong ka jingbud ryntih. Da kaba ailad ïa katei ka jingkyrpad, ka kynhun nongbishar ka la ong ba lada jia ba ym kohnguh ïa ka por ba la buh, ki heh ophisar ki dei ban don ha ka ïingbishar ha ka jingbishar kaba hadien.
