Guwahati, Nohprah:
U Myntri Rangbah ka jylla Assam u Himanta Biswa Sarma ha ka 3 tarik u Nohprah u la pynïaid ïa ka jingïalang ba hakhliehduh ban bishar bniah ïa ki jingpynkhreh na ka bynta ka jingthmu jong u Myntri Rangbahduh ka ri u Narendra Modi ban leit jngoh ïa ka jylla ka ban sdang naduh ka 20 tarik u Nohprah.
Ka jingleit jngoh, ha kaba u Myntri Rangbah ka Jylla, u la ong ba kan long ka jingkylla kaba thymmai jong ka roi ka par,” la khmih lynti ba kan don bun ki jingïalang ha Guwahati bad Namrup.
Ha ka jingpyllait khubor jong u ha ka rynsan, X, u Sarma u la pynbna ba ka Assam ka la pynkhreh pura ban pdiang burom ïa u Myntri Rangbahduh ka ri. “Ka Assam ka la khreh lut ban pdiang sngewbha ïa u Narendra Modi ha ka 20 tarik u Nohprah, namar ba un sa pynbna ïa ka jingkylla ha kaba ïadei bad ka roi ka par ha ka jylla.
Ka la don ka jingkhmih bniah na ka bynta ki jingpynkhreh halor ka jingpdiang burom ïa u bad ki prokram kiba bun kin sa long ha kane ka sngi jong ka jingleit jngoh jong u,” u la thoh ha ka jingphah khubor.
Kumba la pynbeit, la ong ba ha kane ka jingleit jngoh, u Myntri Rangbahduh un plie ïa ka Terminal Building bathymmai jong ka Lokapriya Gopinath Bordoloi International Airport bad un plie ïa u mot sah kynmaw jong u Myntri Rangbah ba nyngkong jong ka Assam, u Lokapriya Gopinath Bordoloi ha Borjhar. La buh por ruh ba u Modi, un ai jingkren ha ka jingïalang paidbah ha Guwahati.
Nalorkata, u Myntri Rangbahduh un buh ïa u mawnongrim na ka bynta ka Brownfield Ammonia-urea Complex kaba thymmai ha Namrup, kaba lah ban pynmih 12.7 lak Metric Ton ha ka shisnem. Yn pynlong ruh ïa ka jingïalang paidbah hangtei kum shi bynta jong ka prokram.
Katkum ka jingpynbna paidbah, u Myntri Rangbah ka Jylla u la bishar bniah ïa baroh ki jingpynbeit na ka bynta baroh ar ki jingïalang ha Guwahati bad Namrup, da kaba bthah ïa ki heh ophisar ban pynthikna ïa ka jingïaid beit bad ban pynlong ïa ka jingpyntreikam kaba jop.
Ha kane ka jingïalang la leit ban ïashim bynta da u Myntri ka Industries, Commerce bad Public Enterprises u Bimal Bora, u MLA ka BJP na Naharkatia u Taranga Gogoi, ki District Commissioner jong ka Kamrup bad Dibrugarh, bad u Managing Director jong ka Assam Valley Fertilizer and Chemical Company Limited u S. P Mahanta.
Ha kane ka sngi la donlang ruh u Chief Secretary u Ravi Kota, u Director General of police u Harmeet Singh bad kiwei kiwei ki heh ophisar.
