Imphal, Nohprah:
U Myntri Rangbah barim jong ka Manipur, u N Biren Singh, u la pynsngew ïa ka jingmaham kaba jur halor kaei kaba u batai kum ka “jingpynjot kaba jur” ïa ki khlaw jong ka jylla, da kaba kyntu ban pyntreikam kyrkieh bad kaba kut jingmut ban ïada na ka jingpynjulor ïa ka mariang kaba la nang jur.
Haba sam ïa ka Video clip ha ka rynsan X ha ka miet jong ka sngi Balang, kaba u la kam ba ka pyni ïa ki jingthung syntiew Poppy be-aiñ bad ka jingpom pathar ïa ki khlaw ha ki lum Kolten bad Selsi hapoh ka T. Waichong Sub-division kaba don ha Kangpokpi distrik, u Singh u la ong ba kine ki dak ki shin kiba paw ki la batai ïa ki daw kiba don ha lyndet jong ka Manipur halor ki jingjia jong ki jingshlei um kiba la wan jia.
“Baroh ki khlaw jong ngi ki la shah pynjot katba ngi dang pyrshang ban tan iwei ia iwei pat shapoh.Ym don uwei ruh na ki nongïalam jong ngi uba la kren pyrshah ïa kum kane ka jingpynjot kaba jur”, la thoh une u nongïalam ka BJP ha ka jingphah khubor jong u.
U Singh u la buh jingkylli ïa ka jingbym leh eiei jong ka tnad ba dei khmih ïa ki khlaw, da kaba kylli balei ba ym shym la shim khia pyrshah ïa kiba donkti.
U la kynnoh ba la suba jur ba ki kynhun lehnoh kiba don tiar ïaleh ki don sha lyndet jong ka jingthung syntiew Poppy bad ka jingpynsyllen ïa ki khlaw ha ka thaiñ.
“Lymda ngi shim ïa ki sienjam kiba thikna, ka jylla kan ïakynduh ïa ka jingeh ha ka jinglong jingman,” u la maham, da kaba khot ïa ka jingïarap kyrkieh ban ïada ïa ka mariang kaba tlot jong ka Manipur bad ban ïada na ka jingpynjot shuh shuh ïa ka.
Ka jingkren jong u ka wan ha ka por ba ka jylla ka dang ïakhun pyrshah ïa ki jingïakynad hapdeng ki jaitbynriew, ka jingshah pynkynriah jaka, bad ki jingeh ha ka jingsynshar, ki mat kiba ki nongkhmih bniah ki ong ba ki la pynkylla ïa ka jingpyrkhat na ki jingma kiba jur kiba lah ban ktah ïa ka mariang.
