Chennai, Nohprah:
Kum ka dak ka jingïatylli kaba pawnam, u Myntri Rangbah ka Tamil Nadu, u M K Stalin ha ka sngi Saitjaiñ u la pynbna ïa ka jingai jingïarap kaba heh bha sha Sri Lanka, ha kaba da ki hajar tylli ki longïing ki la shah ktah jur ha ka ‘erïong Ditwah.
Ha kaba ïadei bad kane, ki la don baroh 950 metric ton (MT) ki tiar ïarap ba la kit na rud duriaw jong ka Chennai bad Thoothukudi ha ki jhaj jong ki shipai duriaw.
Na kane ka jingkit, 650MT la phah na Chennai Port bad 300MT na Thoothukudi Port.
U Myntri Rangbah u la aiti ruh ïa ka song jong ki tiar jingïarap sha u Deputy Consul General ka Sri Lanka u Ganesanathan Geathiswaran ha ka jingïalang ha Chennai Port.
Ka jingphah song ïarap ba nyngkong na Chennai ka kynthup ïa 300MT ka shini, 300MT ki dai ki shana, 25MT ka dud powder, ryngkat bad 5000 tylli ki jaiñ pain, 5000 tylli ki saree, 10000 tylli ki towel, 10000 tylli ki blanket bad 1000 tylli ki plastik dara ïa ki longïing longsem kum shi bynta ban ai jingkyrshan sha ki.
Ka jingkit jong ka Thoothukudi ka kynthup ïa 150MT ka shini bad 150MT ki dai bad ki shana.
Ha kane ka jingïalang la ïadonlang ki Myntri kiba kynthup ïa u P K Sekarbabu (HR&CE) bad u S M Nasar jong ka (Minorities and non-resident Tamils’ welfare) u Chief Secretary u N Muruganandam, ki heh ophisar, bad ki nongmihkhmat na ka Sri Lanka Consulate.
Ki heh ophisar ki la ong ba kane ka jingïarap jong ka jylla ka pyni ïa ka jingïadei kaba la neh slem bha ha ka kolshor bad ka jingdon jingsngew hapdeng ki briew jong ka Tamil Nadu bad jong ka Sri Lanka.
