Chennai, Nohprah:
Haba kdew ïa ka jingshah pynjulor kaba jur na ka jingkhie jong ka ‘erïong Ditwah kaba la ktah jur ïa ki katto katne ki ïing kiba don ha ki nongbah Nagapattinam bad Vedaranyam jong ka distrik, ki nongshong shnong ki pan ïa ka jingmynjur bad jingpyllait pisa kyrkieh na ka tnad pynroi nongkyndong bad ka tnad synshar panchayat raj khnang ban lah ban pynbha bad ban ïoh pynïaid biang ïa kine ki jaka sah.
Ha ka taïew ba ladep, hadien ka Ditwah, kawei ka longïing kaba don saw ngut kiba sah ha kawei kum kine ki ïing ba la shna da ki seng treimon sngewbha hadien ka jingwan ka jingjur ka erïong ha u snem 2004 ha Ambedkar Nagar ha Nagapattinam Municipality ki la mynsaw hadien ba kawei ka bynta jong ka jingkhang ka la hap halor jong ki katba ki dang thiah. Ïa kine la pynkit noh sha ka jaka sumar jong ka sorkar Medical College jong ka distrik kaba don ha Orathur.
Katba u M Suresh, ka kurim jong u ka S Sudha bad u khun u Madhesh ki la lait im da kaba mynsaw malu mala, u khun jong kitei ki arngut uba dang 13 snem ka rta u Prabakaran u la mynsaw bad shah sumar. “Nga bad ka kurim jong nga, u khun rangbah ngi la mynsaw malu mala namar ba ka tnum ka la hap ha ka met bad ki tyrpeng jong ngi, hynrei u Prabakaran u la mynsaw jur namar ba ka la hap ha ka khlieh jong u”, la ong u Suresh. U Suresh, uba dei u nongpyndap marwei, u bym shym la lah ban wan trei naduh ba jia ka jingjia ha ka 4 tarik u Nohprah, u la ong, “Wat la nga dang khlaiñ, hynrei nga hap ban sumar ïa ka ïing ka sem bad sah ha hospital namar ba u Prabakaran u dang shah sumar.”
Haba kylli halor katei ka jingtyrwa, u District Collector P Akash u la ong ha ka lad phah khubor, “Namar ba ki seng trei mon sngewbha ki la shna ïa ki ïing bad ki don ha ka jaka jong ka Municipality, ym don ki skhim ban maramot bad shna thymmai ïa kum kine ki ïing. Ki bor pynïaid distrik namar kata ki la kyrpang na ka tnat Rural Development ba kan mang tyngka na ka bynta kane, haba pyrkhat halor kane yn sa ai da ka pisa kaba kyrpang namar ka jingshah ktah jong ki paidbah. Kane ka long ka daw ba ka jingmynjur ka nang slem namar ba ka sorkar jylla ka hap ban pynlait katto katne ki kyndon namar ba ym don skhim na ka bynta kum kine ki ïing.”
Hynrei u nonglum khajna u la pynthikna ba yn sa pynbeit ïa ka jinglong jingman shwa ka jingwan jong u slap ha u snem ban wan. Ha kajuh ka por, u Secretary jong ka CPM Nagapattinam, u K Venkatesan u la ong, “Kumba ka bor pynïaid distrik ka la dep ban aiti ïa ka jingtyrwa ban shna thymmai ïa ki ïing Tsunami ha ki jaka sor, ka jingmynjur ïa ka shwa ka jingwan jong ka aïom Lyiur ban wan kan ïarap shuh shuh ban ai ki jingïada bad ban khanglad ïa ki jingjia ba sngewsih.”
