Amaravati, Nohprah:
Ki la don kumba 9 ngut ki nongleit riewblei na Chittoor distrik kiba la ïap bad 27 ngut kiwei pat ki la mynsaw hadien ba kawei ka bos leit ïaid riewblei jong ki ka la hap shapoh ka jaka them kaba harud ka surok Tulasipaka Ghat ha Alluri Sitarama Raju (ASR) distrik jong ka jylla Andhra Pradesh ha ka por mynstep jong ka sngi Thohdieng.
Kane ka bos, kaba dei jong ka Vigneswara Travels, ha ka por ba ka jia katei ka bos, ka don haduh 37 ngut ki nongleit ïaid riewblei.
Kane ka jingjia, ka la jia ha ka por kumba 4 baje eiei mynstep jong ka sngi Thohdieng, ha ka jaka kaba kyllaiñ bha ka surok Chintur-Maredumilli Ghat.
Kine ki nongleit ïaid riewblei, ki dei kiba wan na Araku Valley bad la buh por ba kin poi ha ka temple Bhadrachalam, ha ka por mynstep.
Ki kynhun na ki thanat pulit jong ka Maredumilli bad Chintoor ki la poi ha katei ka jaka bad ki la sdang ban pynlait im ïa ki lanot ryngkat bad ki nongshong shnong kiba don ha katei ka jaka.
U Myntri Rangbah ka jylla u Nara Chandrababu Naidu u la pynpaw ïa ka jingkyndit halor kane ka jingjia aksiden bad u la bishar bniah ïa ka jinglong jingman bad ki heh jong ka distrik.
U Naidu u la bthah ïa ki heh ophisar ban poi mardor sha katei ka jaka, ban peit ïa ki kam ba ïadei bad ka jingai jingïarap bad pynlait im, bad ban pynthikna ïa ka jingïarap kaba ïadei bad ka jingsumar ïa baroh kiba la shah ktah.
U Myntri Rangbahduh ka ri u Narendra Modi u la pynpaw ïa ka jingsngewlem bad pynbna ruh ban ai jingïarap pisa kaba mar T. 2 lak sha kiba haïing ha sem bad 50 hajar tyngka sha kiba mynsaw.
