Imphal, Nohprah:
Ka jingïalang bahakhlieh duh jong baroh ki MLA ka seng Bharatiya Janata Party (BJP) na Manipur la buh ban long ha New Delhi ha ka 14 tarik u Nohprah, kaba pyni ïa ka jingkylla kaba lah ban jia ha ka jinglong jingman jong ka saiñ hima sima jong ka jylla namar ba ka dang ïai bteng hapoh ka jingsynshar President.
U Myntri Rangbah barim ka jylla u N. Biren Singh u la pynthikna ha ka 12 tarik, Nohprah ba ki nongïalam bahakhlieh ki la bthah ïa uwei pa uwei u nongthaw aiñ ka BJP ban ïapoilang.
Watla ym shym la pynpaw ïa ka mat ïakren kaba pura, hynrei u la pyni ba ki jingïakren halor ka jingthaw ïa ka sorkar thymmai ki lah ban long.
“La khot ïa ki MLA sha Delhi ban bishar bniah ïa ka jinglong jingman ha Manipur, ym shym la ïathuh ïa ngi ïa ka mat ïakren kaba thikna, hynrei ka lah ban don ka jingthaw sorkar”, la ong u Myntri Rangbah barim ha Imphal ha ka por ba rakhe ïa ka Nupi Lal Day kaba 86.
Ka jylla Manipur ka la treikam hapoh ka President’s Rule naduh ka 13tarik, rymphang, katto katne sngi hadien ba u Biren Singh u la iehnoh kam ha ka 9 tarik, Rymphang.
Ka jylla ka dang don ha ka jingeh namar ka jingshah thombor hapdeng ki jaitbynriew kaba la mih ha ka 3 tarik u Jymmang, 2023, kaba haduh mynta ka la shim ïa palat 260 ngut ki briew bad pynkynriah jaka ïa palat 60,000 ngut ki briew.
Haba ïakren bad ki lad phah khubor, uwei u MLA ka BJP u la ïathuh ba u Coordinator ka North East u Sambit Patra u la ïakynduh ïa kiba bun ki nongthaw aiñ marwei marwei, da kaba bthah ïa ki ba kin don lang ha ka jingïalang kaba long ha ka por 5.30 janmiet.
U president jong ka seng ha ka jylla u A. Sharda ruh u la shah wer bad u lah ban don bynta lang.
Kaba sngewtynnad ka long ba ki MLA jong ka Kuki-Zo, kynthup ïa ki hynñiew ngut na ka BJP, ruh ki la shah khot hajir. Yn peit bniah bha ïa ka jinglong jong ki, namar baroh 10 ngut ki nongthaw aiñ jong ka Kuki-Zo ki la kyntu bunsien ïa ka “jingsynshar ba kyrpang” shwa ban kyrshan ïa kano kano ka jingpynkhreh ban thaw sorkar.
Katba katto katne ngut ki MLA ka BJP ki la kyntu ïa ka Centre ban pynphai biang ïa ka sorkar ba la jied, ka kynhun Kuki-Zo ka la kyntait ban kyrshan ïa kano kano ka jingpynbeit tad haduh ban da pynbeit ïa ka jingdawa saiñ hima sima jong ki.
Ka Ïingdorbar kaba don 60 ngut ki dkhot mynta ka don ïa ka bor kaba treikam bha kaba la sah 59 ngut ki dkhot hadien ka jingkhlad noh jong u MLA ka NPP u N Kayisii.
Ka BJP ka don 32 tylli ki seat, watla hynñiew ngut ki MLA Kuki-Zo jong ka, ki kyrshan ïa ka jingkhot ban pynïakhlad noh.
Wat hapdeng ka jingweng jingkyrshan jong ka NPP, JD(U), KPA bad uwei u MLA shimet, hynrei ka BJP ka dang synshar ïa ka jingbun paid lyngba ki 43 ngut ki dkhot, kynthup ïa 5 ngut ki nongphet seng ka JD(U).
Ka jingbthah ïa ki MLA ka BJP ban ïalum lang ha Delhi ka ïahap bad ka jingleit jngoh ba nyngkong jong ka President Droupadi Murmu sha Manipur, kaba pynjur ïa ka jingpyrkhat halor ka jinglong thylli jong ka jingsynshar kaba la slem bad ka jingkhmih lynti kaba nang kiew ban wanphai biang sha ka jingsynshar ba la jied.
