Guwahati, Nohprah:
Kawei ka longkmie kaba dei ka nongshong shnong jong ka Tezpur, kaba la tip kyrteng kum ka Jyotika Kalita, kaba la pynshisha ba ka la shongkurim ïa u nong Pakistan, ka la shah phah sha phatok, hadien ba ka la shah kem, ha kaba ïadei bad ka kam phah pisa bar ri.
La kem ïa ka ha ka 5 tarik u Nohprah, hadien ba la set ïa ka, ha ka por ba ka la wan phai na Dubai, ha kaba la ïathuh ba kitei ki jingpynïaid pisa, kiba la suba, ki la jia.
Katkum ki tyllong khubor na ki pulit, ka jingïadei jong ka Jyotika bad ka Pakistan ka la paw pyrthei ha ka jingtohkit kaba la sdang naduh ba ki pulit ka Tezpur ki la ïoh jingtip ba la thep ïa ka pisa kaba bun ha ka Bank Account jong kawei ka longïing ha ka shnong Borjhar.
Hadien ka jingsuba ba ka jingwan tuid ka pisa kaba shongdor da ki lak lak na shabar jylla, ki pulit ki la buh da ka Case No. 770/25 hapoh ki kyndon 316(2), 380(4), 340(2), bad 3(5) jong ka Bharatiya Nyaya Sanhita (BNS) bad pynlong ïa ka jingtohkit kaba bniah.
Ha ka jingtohkit ki pulit ki la ïoh kem saw ngut ki briew na ka shnong Borjhar, ka Jyotika Kalita, ka Jitu Kalita, ka Simu Das, bad u Abhijit Das.
Ka kashari kham hashwa, ka la phah ïa ka Jyotika sha along jong ki pulit, na ka bynta ban tohkit bniah, katba ïa ki lai ngut kiwei pat, la set ha Tezpur Central Jail, ha ka 5 tarik u Nohprah.
Ha ka sngi Palei, hadien ba la ïalam ïa ka Jyotika hakhmat ka ïingbishar jong ka Tezpur, ka ïingbishar, ka la hukum ba ïa ka ruh, dei ban phah noh sha phatok Tezpur.
Ki tyllong khubor na ki pulit ki la ïathuh shuh shuh ba ka Jyotika, ka la ïa poi kha bad uwei u nongshong shnong jong ka Pakistan, ha ka 25 tarik, Rymphang, mynta u snem. Naduh ba la shongkurim, ka la leit sha ki katto katne ki ri nongwei, kynthup ïa ka Dubai bad ka United Arab Emirates.
Ka jingtohkit ka la pynlong ruh ban kurup ïa ki 44 tylli ki ATM Card, 17 tylli ki Bank Passbooks, ki Check book, bad kiwei kiwei pat ki kot ki sla na ka Jyotika bad ki paralok jong ka, kaba pyni ba ka lah ban don ka jingïadei bad ka kynhun ba pynïaid ïa ka pisa kaba bun.
Kane ka mukotduma ka dang don ha ka jingtohkit kaba jur, ha kaba ki bor synshar ki dang bishar bniah ïa ki jingïadei shabar ri bad ka tyllong jong ka pisa nabar ri.
