Mawkyrwat, Nohprah 19
Ka kynhun ïalehkai jong ka ophis MeECL bad ka Jakrem ki la ïoh ban khur ïa ka nam lahduh ha ka lympung Inter Office Football Tournament bad ka Women League Football Tournament 2025 ba la pynïaid da ka Mawkyrwat District Sports Association ha madan MDSA Artificial Turf, Nonglang South West Khasi Hills District.
Ha kane ka sngi, ka jinglehkai Inter Office ka la long hapdeng ka Office SP-A pyrshah ïa ka MeECL, ha kaba ka MeECL ka la lah ban pynliem da 1-0 kol bad ïa kane ka kol la ïoh ban thep da u Bikrom Lyngkhoi ha ka minit kaba 20 jong ka kylla step.
Katba ha ka jinglehkai final jong ka Women League, ka Jakrem SC ka la lah ban pynliem noh ïa ka Mawten SC da 2-0 kol, lyngba ki ar kol jong ka samla Barisha Wahlang ha ka minit kaba 17 jong ka kylla step bad ha ka minit kaba 67 jong ka kylla miet.
Na ka liang ka MDSA ha kane ka sngi ka la ïoh ruh ban pynkup burom ïa ki thei ïalehkai phutbol jong ka Jakrem kiba la wanrah nam wanrah burom ïa ka dong ka thaiñ bad ïa ka distrik baroh kawei hadien ba ka la ïoh ïa ka jingjop ha ka lympung 1st Meghalaya Women State League-2025.
Ïa kane ka lympung la wan ba pynhap pyrda da u Bah Renikton Lyngdoh Tongkhar, MLA ka Mawkyrwat Constituency ha ryngkat ka jingdonlang ki nongkitkam ka MDSA naduh u Bah YG Lyngdoh, Working President, MDSA, Bah P. Wanniang, General Secretary, MDSA, Bah Laying Lyngdoh Chairman Football Committee, MDSA, Bah KhrawKupar Shangdiar Secy Football Committee, MDSA, Bah T. Marwein, Treasurer MDSA bad kiwei kiwei ki riew rangbah.
Ha kane ka sngi la ïoh ruh ban sam ïa ki khusnam kyrpang ïa u Bah Moonstar Khar Turnia kum u player ba la heh ka rta na ka Civil Hospital Mawkyrwat.
La ïoh ban sam ïa ka khusnam Top scorer Inter Office ïa u Bah Arrowstar Wanniang na ka Office SP-A uba la ïoh ban thep haduh 7 kol ha baroh kawei ka lympung.
Ïa ka nam Best Player la ïoh da u Bikrom lyngkhoi na ka MeECL Office, Best Goalkeeper da u Krasman Myrthong na ka MeECL Office.
Katba ha ka Women League ïa ka nam Top Scorer la ïoh da ka Juviality Lyngdoh na Mawten kaba la ïoh ban thep haduh 12 tylli ki kol. Ïa ka nam Best Player la ïoh da ka Barisha Wahlan na ka Jakrem bad ïa ka nam Best Goalkeeper la ïoh da ka Banrikordor Wahlang na Jakrem.
