Imphal, Nohprah:
Ki bor pahara ki la pynjulor kumba 601 akar ki jaka rep popy beaiñ ha kylleng ka jylla Manipur ha kine ki san sngi ba la dep, kata naduh ka 16 haduh ka 20 tarik u Nohprah, bad ki la ïoh kurup ïa uwei u bom IED ha Thoubal distrik ha ka sngi Saitjain, la ïathuh ki pulit.
Ka jingpynshitom kaba jur tam ka dei kaba la pynlong ha Manipur’s Ukhrul distrik ha kaba ki bor pahara ki la pynjot ïa ki jaka rep be-aiñ kiba heh 559 akar ha kylleng ki lum ha LM Block, Yaolen, Lamlai Chingphei, Shongphel, Mullam, Torah, Champhung, Teinem, Phalee bad ki thaiñ Changta kiba hap hapoh ka jingkhmih jong ki jaka treikam jong ki pulit ha Litan bad Somdal.
Nalor kata, 82 tylli ki ïing rit ba la lap ha ki jaka thung la pynpra bad la kurup ïa ki poppy.
“La mudui lai tylli ki ejahar ha kaba ïadei bad ka jingïakhih pyrshah ïa ka kper poppy,” ong uwei u heh pulit.
Ki bor pahara ki la pynpra ruh ïa ki jaka rep poppy be-aiñ kiba heh haduh 42 akar ha ki jaka lum jong ka thaiñ L. Simol, Jangnomphai bad SP Ngaimun jong ka Kangpokpi distrik, ha kane ka por ki la ïoh ban kurup bad pynpra ïa ki 20 tylli ki ïing trep, 15 song ka mluh, 5 kg ka sboh , 5 litre ka Herbicide bad 5 kilo ki symbai poppy.
“Kum kine ki jingpynjot ïa ki poppy kin dang ïai bteng, bad da kaba buh hakhmat eh ïa ka jingpynduhjait ïa ki lyngkha poppy be-aiñ, ki paidbah ki dei ban ïatreilang bad ki bor pahara ban pynthikna ïa ka jingjop kaba neh ha ka jingpyntreikam,” ong uwei u heh pulit.
U Superintendent of Police (SP) ka tnad Narcotic Affairs of Border (NAB) u Watham Basu u la ong kham mynshwa ba ha kine ki 8 snem ba la leit haduh u bnai Nailar, ka NAB ryngkat bad ki bor pahara ki la pynjot 18,212.4 akar ki jaka rep poppy beaiñ bad ki la ïoh ban kem palat 3,200 ngut ki briew bad ki nongdih drok bad poppy ha kaba ïadei bad kine ki kam.
Ha kajuh ka por, ha ka sngi Saitjaiñ, ki bor pahara kiba pynlong ïa ka jingkhynra bad ka jingsynshar ïa ki jaka ba bun ha ki jaka ba marjan bad ki jaka ba rit paid ha kylleng ka Manipur na ka bynta ban ïoh kurup ïa ki tiar ïaleh bad ki tiar siat, ha kane ka por ki la ïoh kurup ïa uwei u bom IED uba khia kumba 9 kg, lai song ki kuli 12-bore ki bym pat pyndonkam bad 13 tylli ki song jong ki jait kuli bapher bapher.
Kane ka jingïoh kurup ka long shi bynta jong ka jingbteng jong ki pulit ban pynlong ïa ka jingleit khynra tiar siat kaba la neh naba la sakhi ba ki kam pyntriem bad ka jingap jingma ïa ka shongsuk shongsaiñ ka dang lah ban mih.
Ki pulit ka Manipur, ha ka kyrwoh ba la pynmih ha ka sngi Saitjaiñ, ki la ïathuh ba ïa kitei ki tiar siat la lap na Monglham Base bad ki jaka ba marjan bad ki jaka ba don ha kjat lum kiba hap hapoh jong ka jaka treikam ki pulit ka Thoubal Dam kaba don ha Imphal East distrik.
