Shillong, Nohprah 28
3 ngut ki khynnah ïalehkai ka shlem ai jinghikai jong ka SAI Training Centre, Shillong bad kiba dangpule hapoh ka skul OM Roy Memorial Higher Secondary School na Mawlai Kyntonmassar, ki la pynïasoh bad ka Mohun Bagan Super Giant na ka bynta ka kynhun ïalehkai Under-16.
Kine ki long u Ebenezer Sun, Jonathan Kharbani bad u Paulbious Tariang.
“Ngi sngewkmen ba kine ki khynnah jong ngi ki la ïoh ïa kum kane ka lad ban leit pynïasoh bad ka Mohun Bagan Super Giant, kaba long ka klob kaba paw ha Kolkata bad wat hapoh ri India,” la pynpaw ka Principal jong ka skul O.M Roy, i Kong A. Syiemlieh ha ka jingïakren dangshen bad U Nongsaiñ Hima.
Shuh shuh i la pynpaw ruh ba kane ka long ka kabu ksiar ïa kitei ki khynnah ba kin nangjam shaphrang ha ka kam ïalehkai phutbol bad kyrmen ba kin long kiba paw bad kiba tyngshaiñ bad ruh ba shisien ka sngi kin ïoh ban phong ïa ka jersey jong ka India ha ki kyrdan ïalehkai jong ki.
Lah ban pynkynmaw, u Jonathan u dei uba ïashim bynta ïa ka Mawkasiang SC ha ka Fourth Division bad ruh ha ka Champions Cup mynta u snem ba la pynïaid da ka Shillong Sports Association. Katba u Ebenezer bad u Paulbious, ki dei kiba dangshim bynta ha ka Subroto Cup bad ka Reliance Foundation Youth Sports tournaments mynta u snem.
