Agartala, Kyllalyngkot:
Ka Vishwa Hindu Parishad (VHP), ha ryngkat ki dkhot jong ka jaitbynriew Sanatani, ki la pynlong ïa ka jingïakhih bad jingïaid paidbah ha Raghna Border ha North Tripura ha ka 6 tarik u Kyllalyngkot.
Ki nongïakhih ki la dawa ban pynsangeh noh mardor ïa ka khaïi pateng hapdeng ka India-Bangladesh. Nalorkata, ki la khot ruh ban khanglad ïa ki mar rep na Bangladesh.
Kane ka jingïakhih ka long hadien ka jingkynnoh ba don ki kam thombor pyrshah ïa ki jaitbynriew rit paid Hindu ha Bangladesh.
Katkum ka jingong jong ka VHP, kane ka jingïakhih ka thmu ban pynpaw ïa ka jingshah lehbeiñ, ka jingshah thombor ba la thmu, bad ka jingshah pynïap jong ki Hindu ha ka ri ba marjan.
Kham mynshwa, ki nongïakhih ki la ïalum ha Dharmanagar’s BBI Maidan ha ka por shiteng sngi.
Hadien kata, ki la pynmih ïa ka jingïalang bike bad kali. Hadien kane ka jingïaid paidbah ka la ïaid shakhmat sha Raghna Land Customs Station (LCS) kaba don ha North Tripura District.
Mar ïa poi ha ki jaka khappud, ki nongïakhih ki la pynlong ïa ka jingïakhih kaba jai jai.
Ha kajuh ka por ki la dawa ban pynsangeh noh ïa ki kam shalan mar lyngba ka Raghna LCS.
Hadien kata, ki nongïalam jong ka VHP ki la aiti ïa ka jingthoh jingkynmaw sha ki heh nongpynïaid.
Ha ka, ki la pynpaw ïa ka “jingsngewkhia kaba jur bad ka jingsngewsih kaba jur” halor kaei kaba ki la batai kum ki jingthombor bad ki jingthmu pynïap ba la thmu ïa ki rit paid Hindu ha Bangladesh.
Ha ka jingthoh jingkynmaw, ka seng ka la ong ba ki jingjia jong ka jingshah thombor pyrshah ïa ki Hindu ki la poi sha ka “pud kaba ym lah ban shah.”
Namar kane, ka la ong ba ki briew ha North Tripura kim nud shuh ban pynneh ïa ka khaïi pateng ne ka jingïakren bad ka Bangladesh lyngba u khappud.
Kumta na ka liang ka VHP ka la dawa ban khang noh mardor ïa u khappud Raghna.
Ka la pan ruh ban pynsangeh noh ïa baroh ki kam khaïi pateng hapdeng ki arliang mamla.
Ka seng ka la ong ba ka burom jong ka ri bad ka jingshngaiñ jong ka jaitbynriew Hindu ka dei ban long kaba kongsan tam ban ïa ki jingïadei ha ka ïoh ka kot.
Ha kajuh ka por, haba kren sha ki lad pathai khubor, u Coordinator ka Rally u Birendra Das u la ong ba kane ka jingïakhih ka long hadien ka jingshah pynïap jong u samla Hindu u Dipu Chandra Das ha Bangladesh.
U la kdew ruh ïa ka jingbteng jong ki khubor jong ka jingshah thombor pyrshah ïa ki Hindu bad kiwei kiwei ki jaitbynriew rit paid.
Shuh shuh, u Das u la dawa ïa ka jingpynshitom kaba long ka jingsneng ïa kito kiba donkti.
U la kyntu ïa ki bor synshar ban shim ïa ki sienjam kiba skhem ban pynthikna ïa ka jingai jingïada bad ka jingshngaiñ jong ki jaitbynriew rit paid ha Bangladesh.
Khatduh eh, ki nongïakhih ki la kyrpad ïa ki nongshong shnong ka India ba kin ieh noh ban thied ïa ki mar jong ka Bangladesh.
Ki la ong ba ka khaïi pateng arliang mamla ka dei ban sahteng haduh ba ki kam thombor pyrshah ïa ki Hindu ha Bangladesh kin kut noh.
