Guwahati, K’lyngkot:
Ka sorkar Assam ha ka 6 tarik u Kyllalyngkot, ka la pyndep ïa ka jingpynkynriah ïa ki briew ban pynkhuid na ki jaka, ïa ki jingkynnoh ba la shah ktah na kumba 6,200 bigha, jan 830 hektar ki jaka hapoh ka jaka ri mrad ha Burhachapori, kaba la ktah ïa kumba 710 tylli ki longïing, la ïathuh ki heh sorkar.
Kane ka jingpynkynriah briew kaba ar sngi ka la sdang naduh ka 5 tarik u Kyllalyngkot ban pynkynriah ïa ki jaka sah be-aiñ na ki jaka khlaw kiba la saphriang ha kylleng ki distrik Sonitpur bad Nagaon bad la pynkut noh ha ka janmiet jong ka sngi Ba-ar.
U Ananda Kumar Das, u District Commissioner ka Sonitpur, u ïathuh ba haduh 710 tylli ki longïing, ki la bat beaiñ ïa ki jaka khlaw, kiba don hapoh katei ka jaka ba la ïada.
“Ha ka jingtrei kaba ar sngi, ka bor synshar ka la lah ban pynkynriah noh ïa baroh ki nongshong beaiñ bad pyllait ïa ki jaka ba la shah ktah”, u la ong.
Ïa kane ka jingshah beh shnong la pynlong ha kiba bun ki jaka kiba hap hapoh ka Tezpur Sadar bad ka Dhekiajuli Revenue Circle, kynthup ïa ka Jamuktol, Arimari, Siyalichar, Baghetapu, Galatidubi, Lathimari, Kundulichar, Purba Dubramari bad Batulichar.
Ki heh sorkar ki la ïathuh ba ka bor synshar distrik ka la kynriah ban pynkhuid ïa ki jaka kiba dang sah hadien ba la dep ban pyllait ïa ki jaka kumba 40 percent kham mynshwa.
Katkum ka jingong ki heh sorkar, kitei ki nongwan rung tuh ki la shna ïing bad rep jingthung hapoh katei ka jaka ri jingri.
Katba bun ki nongshong shnong ki la pynpra ïa la ki ïing ki sem bad ki la pynkynriah hi dalade, don pat kiba sahkut ha ka jaka da kaba kdew ïa ka jingkhriat kaba jur bad ki la pan por ban kheit ïa ki jingthung. Hynrei ka bor synshar ka la kyntait ban pynsangeh noh ïa katei ka jingtrei, da kaba ong ba ym lah ban shah ïa ka jingshim jaka beaiñ ïa ki jaka khlaw khlem da kheiñ ïa ka aïom.
U Senior Superintendent of Police ka Sonitpur u Barun Purakayastha u la ïathuh ba ïa kane ka jingkhynra baroh kawei la pyndep khlem kano kano ka jingjia ba sngewsih. Palat 300 ngut ki pulit la pyntreikam ban pynneh pynsah ïa ka suk ka saiñ, katba 36 tylli ki kali tih maw bad 60 tylli ki traktor la pyndonkam ha kane ka jingpynkhreh kaba ar sngi.
Ha kawei na ki jingpynkynriah shnong kaba heh tam ha ka jylla, ka sorkar Assam ka la pynkhuid kumba 2,099 hektar ki jaka ha Burhachapori Wildlife Sanctuary bad ki shnong ba marjan ha u bnai Rymphang jong u snem ba la dep, kaba la ktah haduh 12,800 ngut ki briew. Hynrei ha u bnai Naitung, uwei u briew u la ïap bad ym duna ïa ka hynriew ngut kiwei pat ki la mynsaw ha ka jingïakynad hapdeng ki nongwan rung tuh bad ki nongap khlaw haba don ki nongshong shnong kiba pyrshang ban rung biang sha ki jaka ba la pynkhuid.
Ka Burhachapori Wildlife Sanctuary, kaba don ha ka jingheh kaba 44.06 square kilometer ha ka rud wah ba Shathie jong ka wah Brahmaputra, ka don kumba 180 km shaphang Mihngi na Guwahati bad 40 km shaphang Shathie na Tezpur. Ka khlaw ba la ïada ka dei ka bynta ba kongsan jong ka mariang jong ka Laokhowa-Burhachapori bad ka long kum ka jaka ba la pynbna jong Kaziranga National Park and Tiger Reserve.
