Kolkata, Kyllalyngkot:
Ka kynhun Enforcement Directorate (ED) ka la leit sha ka Calcutta High Court ban pan jingtohkit da ka CBI halor ka bynta jong ka Mamata Banerjee Myntri Rangbah ka West Bengal, ki heh pulit bad kiwei kiwei halor ka jingkynnoh ba ki la khanglad ïa ki jingkhynra jong ka ha Kolkata pyrshah ïa ka Political Consultancy Company I-PAC bad u Director jong ka.
Ka lad phah khubor ka la bishar bniah ïa ka jingthoh jingtar jong ka tnad tohkit jong ka sorkar pdeng, ha kaba ka la pan ruh ban “kurup mardor, ban khang, ban pynneh pynsah, bad ban pynphai biang sha ka jingpyntreikam kaba dei hok ïa ka ED” ïa baroh ki tiar Digital, ki Electronic Records, ki Storage Media bad ki kot ki sla “be-aiñ bad jubor” ba la shim noh na ki jaka ba la pynlong ïa ka jingleit khynra.
Ïa kane ka jingkhynra la pynlong ha ka sngi Palei ha ka ophis jong ka I-PAC ha Salt Lake bad u nongseng jong ka bad uwei na ki nongpynïaid jong ka, u Pratik Gandhi kum shi bynta jong ka jingkynnoh ba la donkti ha ka kam thok dewïong. Katto katne tylli ki jaka kiba don ha ka jylla bad ha Delhi ki la shah khynra.
Ka kynhun ED ka la kynnoh ha ka jingpynbna pathai khubor ha ka sngi Palei ba ka Banerjee ka la rung sha ka ïing sah jong u Jain ha surok Loudon ha Kolkata ha ka por ba ki leit khynra bad “shim noh ïa ki sakhi sabut ba kongsan” bad ka la bud ïa kajuh ka jingleh ha ka ophis jong ka I-PAC.
Ka kynhun ED ka la kynnoh ha ka dorkhas ba kumba 20 klur ka pisa jong ka Hawala, kaba la ïoh na ka jingkynnoh ba la tuh ïa u dewïong ha West Bengal, ka la lap ïa ka jingïaid lynti sha ka I-PAC.
Ka seng ka la ai jingmut ha ka saiñ pyrthei sha ka TMC bad ka sorkar jylla naduh u snem 2021.”Ki tiar ba thikna ba la lap ha ka por ba tohkit ki la pynpaw ba ym duna ïa ka 20 klur tyngka ka jingmih na ki kam runar la pynkynriah sha ka IPAC lyngba ki jingpyntreikam ba beaiñ.
“Ha ka jingbteng ïa ka jingtohkit kaba dang ïaid shakhmat bad ban wad ïa ka jingmih na ka kam runar bad jingpyndonkam ïa ka la sdang ïa ka jingtohkit pyrshah ïa ka IPAC bad ki katto katne kiwei pat ki kynhun ha kaba ïadei bad ka mukotduma khaïi tuh ïa u dewïong,” la ong ka dorkhas.
Ka la ong ba ka Myntri Rangbah ka la rung shapoh katei ka jaka wat hapdeng ka “jingkyrpad kaba jur (da ki heh jong ka kynhun ED) namar ba kam shym la tuklar ïa ka jingtalasi kaba dang ïaid hapoh ka PMLA.”
“Hynrei, da kaba pynkheiñ ïa baroh ki aiñ bad ka shongsuk shongsaiñ, ka Mamata Banerjee ryngkat ka jingïarap jong ki pulit, ka la shim jubor ïa baroh ki tiar Digital ryngkat bad ki kot ki sla ba kongsan kiba pynngat ïa ka jingkynnoh na ka kti jong u ophisar ba la ai bor bad ka la mih noh na katei ka jaka ha ka por kumba 12:15 PM,” la ong ka khubor.
Ka tnad ka la kynnoh ba ïa ki Panch kiba dei ki nongsakhi la rahbor da kiba shah mudui (ka jylla West Bengal, Myntri Rangbah bad kiwei kiwei) bad la pynlong ïa ki ban thoh ba ïa ka jingwad la pynlong ha ka rukom kaba suk bad ym shym la lap ei ei ban ïa kaba la buh jingthoh da kaba shisha ne kaba dei da kaba buh jingthoh ba ki kot ki sla ba la shim da ki tiar Digital bad ki shabi ki long ha ka Myntri Rangbah ba donburom da ka jingïarap jong ki pulit ka jylla.”
Ka kynhun ED ka la ong ba ki heh jong ka “kim shah ban pyndep ïa ki kamram jong ki katkum ka aiñ bad la khanglad ïa ki ban pyndep ïa ki kamram jong ki.”Ka tnad ka la kyntu ruh ïa ka ïingbishar ba hakhliehduh ban pynmih ïa ka hukum ba shipor kaba khanglad ïa kano kano ka jingïoh rung, jingpyndam, jingpynbuh bujli, lane jingpynkylla ïa ki tiar Digital bad Electronic Record.
