Guwahati, K’lyngkot:
Ha ka jingpynlong ïa ka jingkhynra kaba jur halor ka jingleh thok ha ka kam sumar briew ha Assam, ka kynhun ba la ïalam da u Ophisar-in-Charge ka Dhubri Police Station ka la ïoh ban kem ïa uwei u briew uba la leh mynleh kum u doktor watla um don ïa ka kyrdan pule doktor kaba biang ne pynrung kyrteng.
Ka jingkem ka la long hadien ki jingtip kiba lah ban ngeit ba u nongshah kynnoh u la sumar be-aiñ ïa ki nongpang, da kaba buh ïa ka jingim ki paidbah ha ka jingma kaba khraw.
Katkum ka jingthoh ba la sam da ki pulit jong ka Dhubri ha ka rynsan ha ka janmiet jong ka sngi Palei, une uba la shah kynnoh u “ïalehkai bad ki jingim khlem ka kyrdan ne jingpynrung kyrteng kaba biang.”
Ka jingleh jong ki pulit ka pynpaw ïa ka jingsngewkhia kaba nang kiew halor ki briew ki bym tbit kiba trei kum ki doktor, khamtam ha ki jaka ba rit paid ha kaba ki nongpang bunsien kim ïoh ïa ki jaka sumar ba la pynshisha.
Ha ka khubor jong ki, ki pulit ki la pynmih ïa ka jingbthah paidbah kaba khlaiñ bha da kaba ong, “Ka koit ka khiah jong phi kam dei ka jinglehkai. Pynshisha beit ïa ki kot ki sla jong u doktor shwa ban sumar. To long kiba husiar, to long kiba koit ba khiah!” Ka Post ka la Tag ruh ïa ka ophis jong u Myntri Rangbah ka jylla Assam, ki pulit Assam, bad ki heh ophisar, da kaba pynpaw ïa ka jingma jong ka kam runar.
Ki tyllong khubor ki la pynpaw ba uba shah kynnoh u la ju ai jingsumar katba u la pynpaw lamler ïalade kum u doktor uba tbit.
Kum kine ki kam kim pynkheiñ tang ïa ki kyndon jong ka koit ka khiah bad ka aiñ hynrei ki buh ruh ïa ka jingma kaba khraw ïa ka jingshngaiñ jong ki nongpang, namar ka jingbym lap bad sumar bha ïa ka jingpang ka lah ban wanrah ïa ki jingeh kiba jur ne wat ïa ka jingïap.
Ki riew shemphang ha ka liang ka koit ka khiah ki la maham bunsien ba ka jingsumar da ki doktor ki bym tbit ka lah ban wanrah ïa ka jingpyndonkam bakla ïa ki dawai, ka jingpynslem ïa ka jingsumar kaba biang, bad ka jingma kaba ym lah ban pynphai pat.
Ka jingjia ka pynpaw ïa ka jingdonkam ban pynsngewthuh paidbah bad ban buddien bha ïa ki rukom sumar ha ka kyrdan ba hapoh.
Ki pulit ki la sdang ïa ka jingtohkit ban pynthikna haduh katno une uba la shah kynnoh u la treikam, ka jingbun ki nongpang kiba shah ktah, bad la don ne em kano kano ka kynhun kaba donkti.Yn pyntreikam katkum ki kyndon kiba ïadei bad ka aiñ.
Ki bor pynïaid ki la kyntu ïa ki nongshong shnong ban pyntip ïa kino kino ki rukom sumar kiba suba bad ban pynshisha ïa ki doktor lyngba ki jingpynrung kyrteng ba thikna jong ka Medical Council shwa ban wad jingsumar.
