Imphal, K’lyngkot:
Ka jingbthei bom ha kawei ka jaka theh umphniang ha ka surok Moirang Kumbi ka la pynlong ïa ki trai petrol pump ban pynbna ban khang khlem buh por ha kylleng ka them Manipur bad ki jaka ba marjan naduh ka 10 tarik u Kyllalyngkot.
Haba pynrem jur ïa ka jingshah hiar thma ha Elidas Fuel Station ha ka 8 tarik Kyllalyngkot, ka Manipur Petroleum Dealers Fraternity ka la ong ba ka jingbthei bom kaba la ju jia man ka por sha ki jaka die umphniang ka la pynlong ïa ki nongdie umphniang ba kim lah shuh ban bteng ïa ka jingtreikam da kaba suk.
Ka seng ka la batai ïa katei ka jingjia kaba khatduh kum ka jingeh kaba khraw, da kaba kdew ba ïa katei ka jingshah thombor la leh da ki nongleh kam sniew ki bym lah ban ithuh.
Kane ka dei ka jingjia kaba ar kaba kum kane tang hapoh shibnai tam. Uwei u nongdie umphniang pump u la shah thombor kham mynshwa ha ka 6 tarik u Nohprah, kaba la pynmih jingtieng hapoh ka kynhun jong ki para ba la ïatreilang halor ka rukom byrngem pyrshah ïa ki nongdie umphniang.
Watla ka kam ba ki bor synshar ki la shim khia ban pynbha ïa ka jingïada, ka MPDF ka la ong ba kane ka jingbthei ka pynpaw ïa ki jingma kiba dang ïai bteng kiba ki nongdie bad ki nongtrei ki ïakynduh.
Ka seng ka la ong ba tang ki jingpynthikna kim biang shuh hadien ka jingbthei kaba khatduh.
Haba khring ïa ka jingpyrkhat jong ka sorkar Manipur, ka MPDF ka la ong ba kam lah ban bteng ïa ka kam hapoh ki jinglong jingman kiba mynta. Ka la dawa ban pynkhlaiñ ïa ka jingpahara ïa ki petrol pump, ki nongdie bad ki nongtrei ban pynthikna ba kin ym jia kum kine ki jingjia ha ki por ban wan.
Ka seng ka la khot ruh ïa ka sorkar ban shim ïa ka jingkitkhlieh kaba pura na ka bynta kino kino ki jingjia ha ki por ban wan, kynthup ia ki jingbthei bom ne ki jingshah rahbor, bad ban siew bai lutksan ïa ki jingtei jong ki jaka theh umphniang.
Ka la pan ïa ka jingsiew bai lutksan kaba heh tam ha ki khep ba don jingmynsaw ne jingduh jingim kiba ïadei bad ki nongdie ne ki nongtrei, bad ka jingsiew bai lutksan kaba kloi na ka bynta ka jingpynjot ïa ka Elidas Fuel Station.
Da kaba pynpaw ba donkam ban shimkhia kyrkieh, ka MPDF ka la pynbna ba baroh ki petrol pump ha ka them bad ki jaka ba marjan kin khang khlem kut por tad haduh ban da pyndep ïa ki jingdawa jong ka.
