Guwahati, K’lyngkot:
U Myntri Rangbah ka Assam u Himanta Biswa Sarma ha ka 13 tarik, Kyllalyngkot, u la leit jngoh ïa ka ïing sah jong u nongïalam barim jong ka BJP bad u Myntri barim ka sorkar pdeng u Kabindra Purkayastha ha Silchar ban dem nguh bad ban ai ka jingsngewlem sha ka longïing kaba la duh noh ïa u.
“Nga la leit jngoh ïa ka ïing sah jong u Kabindra Purkayastha ba la khlad noh ha Silchar ban pynpaw jingsngewlem ïa ka mynsiem ba la khlad noh, uba la noh synñiang shibun sha ka imlang sahlang bad ka saiñ hima sima jong ka Assam.
U Purkayastha u la khlad noh ha ka rta kaba 94 snem ka rta na ki jingshitom jong u ha Silchar Medical College and Hospital ha ka 7 tarik, Kyllalyngkot.
U nongïalam ba la rim bad paw jong ka seng BJP, u Kabindra Purkayastha u la mihkhmat ïa ka Silchar Lok Sabha konstitwensi lai sien, hadien ba u la shah jied ha u snem 1991, 1998, bad 2009. U la shakri ruh kum u Myntri ka sorkar pdeng ba dei peit ïa ki lad ai jingtip.
U Purkayastha u la iehnoh shadien ïa u khun jong u u Kanad Purkayastha uba dei u MP ka BJP ha Rajya Sabha na Assam bad kawei ka khun kynthei.
