Imphal, K’lyngkot:
Da ka jingïatreilang ha ka 13 tarik u Kyllalyngkot, 2026, ki bor pahara bad ka tnad khlaw ha Manipur ki la lah ban pynjot ïa ki lyngkha rep syntiew Poppy kiba don ha kylleng ka distrik Senapati bad Chandel.
Ha Sadim Hills range kaba hap hapoh ka Senapati Police Station ha Senapati distrik, kumba 30 akar ki jaka rep poppy la pynjulor hapoh ka jingpeit jong u Executive Magistrate.
Katba ha ka thaiñ Govok Hill Range kaba hap hapoh Chakpikarong Police Station ha Chandel distrik la pynduh pyndam noh ïa kumba 65 akar ki lyngkha pop. Ha ka jaka jong u Chandel, ki bor pynïaid ki la pynpra ruh ïa ar tylli ki ïing rit ba shipor ryngkat bad ki poppy bad ki symbai ba la lap ha katei ka jaka.
Ha kajuh ka por, ki pulit ka Manipur ki la ïoh ban kem ïa lai ngut ki dkhot ba treikam bha jong ka kynhun ba la ñiew beaiñ ka KYKL (SOREPA) na ki jaka bapher bapher ha Imphal West bad Kakching distrik. Kine ki briew kiba la shah kem ki dei kiba la tip kyrteng kum u Keithelakpam Telheiba Mangang (23) jong ka Kwakeithel Heinou Khongnembi, Imphal West, ki la shahkem na Kangabam Leikai; Konthoujam Gooddy Meitei (23) jong ka Joypur Khunou, Bishnupur, la kem na Kwakeithel Thokchom Leikai; bad u Laishram Ichan Devi (30) jong ka Wabagai Terapishak, Kakching, la kem na Kwakeithel Bazar.
Ki bor pynïaid ki la kurup lai tylli ki mobile phone, saw tylli ki sim card, T.. 6,000 ka pisa bad kawei ka thuk thuk Yamaha na kitei ki lai ngut.
Katkum ka khubor na ki pulit, kitei ki lehnoh ba la shah kem ki donkti ha kaba pynrung dkhot thymmai, ha kaba ki la donkti ha ki kam dawa pisa ha ki jaka them, bad ha kaba ai jingkyrshan ïa ka seng jong ki.
Ki bor pahara ki dang bteng ban pynlong ïa ki jingtalasi bad ka jingsynshar ïa ki jaka ha ki jaka ba marjan bad ki jaka ba rit paid ha kylleng ka jylla ban khanglad ïa ki kam be-aiñ kiba dang jur shuh shuh. La pynkhlaiñ ruh ïa ki lad ki lynti ban pynthikna ïa ka jingleit jingwan jong ki mar ba kongsan ha ka NH-37, ha kaba 165 tylli ki kali kiba kit ïa ki mar ba kongsan la buddien bad la pynbiang ïa ki kynhun pahara lyngba ki jaka ba kham buh jingma.
Kine ki jingtreikam ba la ïatreilang ki pynpaw ïa ki jingpyrshang kiba dang ïaid shakhmat da ki bor pynïaid aiñ bad ki bor khlaw ban tehlakam ïa ka jingrep drok be-aiñ bad ban pynneh ïa ka aiñ bad ka shongsuk shongsaiñ ha kylleng ka Manipur.
