Aizawl, K’lyngkot:
Ka seng Congress, kaba dei ka seng ka liangpyrshah jong ka Mizoram, ha ka lah sngi U Blei, ka la pynmih ïa ka thup kyrteng ba nyngkong jong ki kyrtong jong ka, na ka bynta ka ilekshon sha ka Aizawl Municipal Corporation (AMC) kaba don 19 ngut ki dkhot, ha kaba ïa ka tarik, ym pat lah ban pynbna da ka Election Commission jong ka jylla.
U President ka seng Congress ha ka jylla u Lal Thanzara u la pynbna ïa ki kyrteng jong ki 13 ngut ki kyrtong na ka bynta ka ilekshon Municipal ban wan ha ka jingïalang kaba la pynlong ïa ka jingplie ïa ka Congress Bhavan na ka bynta mynta u snem.
Ka Zoram People’s Movement (ZPM) kaba don ha ka liang synshar, ka Mizo National Front (MNF) kaba don ha ka liang pyrshah ba kongsan bad kiwei kiwei ki seng kim pat lah ban pynbna ïa ki kyrtong jong ki.
Haba kren ha kane ka sngi, u Lal Thanzara u la kyntu ïa ki nongbud jong ka seng ba kin ïai neh ha ka seng bad ban ym duh mynsiem wat lada ka ïakynduh ïa ki por kiba eh bad ki jingshah pynphaidien ha ka ilekshon.
U la ong ba ki jingshah rem ha ki ilekshon ki long kum ka bor ba lam lynti ban pynkhlaiñ ïa ka seng ha ki por ban wan.
U Myntri barim jong ka tnat ka koit ka khiah u la kam ba ka seng ka la ïoh ïa ka jingkiew kaba khraw ha ka saiñ pyrthei ha ka ilekshon ha u snem 2025 haba ïanujor bad ki snem ba la dep.
U la kynnoh shuh shuh ba ki briew ki la sdang ban buh ïa ka jingngeit jong ki ha ka Congress namar ba ki la duh jingkyrmen hapoh ka sorkar Mizo National Front (MNF) bad Zoram People’s Movement.
U Lal Thanzara, u hynmen jong u Myntri Rangbah barim u Lal Thanzara, u la pynbna ba ka seng jong u kan wanrah biang ïa ka New Land Use Policy (NLUP), ka prokram ba kongsan jong ka Congress kaba thmu ban ai ka roi ka par kaba neh sha ki nongrep bad ki kynhun kiba duna ka ïoh ka kot da kaba tyrwa ïa ka jingïarap pisa na ka bynta ki seng kiba dang sdang.
Ïa kane ka skhim la sdang nyngkong ha u bnai Nailur 2011 ha ka por ba ka Congress ka dang synshar ha ka jylla.
Ha kajuh ka por, u H. Lalthlangliana u Conmissioner jong ka Jylla Mizoram u la ong ba haduh mynta ka Poll Panel ka dang hap ban pynbna ïa ka por ban pynlong ïa ka jingthep vote ha AMC.
U la ong ba ka samoi treikam jong ka Municipality kaba mynta kan kut noh ha ka 1 tarik u Lber.
U la bynrap ruh ba ki heh sorkar ki la pynkhreh naduh u bnai Nailur jong u snem ba la dep bad ki la pynmih ïa ka thup nongthep vote ba khatduh ha ka 7 tarik u Kyllalyngkot, kaba pyni ba ki don palat 2.39 lak ngut ki nongthep vote, kynthup ïa 1.29 lak ngut ki nongthep vote kynthei, ha kylleng ki 19 tylli ki ward kiba hap hapoh ka jingpeit jong ka AMC.
Ha ka jingthep vote ba khatduh jong ka AMC kaba la long ha u bnai Rymphang 2021, ka MNF ka la jop ïa ka jingbun paid da kaba ïoh 11 tylli ki seat, katba ka ZPM ka la ïoh 6 seat bad ka Congress ka la jop 2 seat.
