Nongpoh, K’Lyngkot 16
Kum shi bynta ban sei ïa ki ‘thei rahnar kiba kynsai na ka Jylla, ka Meghalaya Weightlifting Association (MWA) ka la rai ban pynlong ïa ka lympung ïalehkai rahnar ba la tip kum ka 2nd ASMITA Weightlifting League 2026 ha Ri Bhoi District.
Ïa kane la pyntip da u Bah Donald Rymbai, President ka MWA ha ryngkat ka jingdon lang u Bah Batskhem Basaïawmoit Secretary ka MWA ha ka jingïakren bad ki lad pathai khubor ha ka sngi Thohdieng ha Nongpoh.
Utei u nongïalam u la ïathuh ba ka jingpynlong ïa kane ka lympung ka dei ruh hadien ka jingbthah jong ka Indian Weightlifting Federation bad ïa kane ka lympung, ka MWA ka la rai ban pynlong ha ka 20 tarik mynta u bnai ha madan Basketball Court jong ka shnong Nongpoh ha Sajer.
U Bah Donald Rymbai ula pyntip ruh ba ka por ban sdang ïa katei ka lympung kan dei naduh ka por 10 baje ha katei ka sngi bad u la kyntu ïa ki nongwan ïashim bynta ba ki dei ban poi hashwa katei ka por.
Halor kane ka bynta, u Bah Donald u la wer ïa ki ‘thei ïalehkai ka Jylla kiba kwah ban ïashim bynta ba kane ka lympung ba kin wan shakhmat ban shim bynta ha katei ka tarik bad u la ong ruh ba ki nongjop ha kane ka lympung kin ïoh pat ïa ka lad ban mihkhhmat ïa ka Jylla ha ki lympung ïalehkai ki ban sa long sha kiwei pat ki jylla jong ka ri.
