Shillong, K’Lyngkot 16
Ka AIMS ha ryngkat ka kynhun ki nongmareh na ka nongbah Shillong, kin pynlong ïa ka jingïakop mareh ba la tip kum ka ‘Shillong City Run’ kaba 10km ha ka 5 tarik u Rymphang mynta u snem ha kane ka nongbah.
Ka jingthmu jong kane ka jingïakop ka long ban pyllait na ki khun samla na ki jingdih pynbuaid kum u drok, uba la pynjot pynpra ïa ki longïing longsem bad ka imlang sahlang.
Te kumta la khot sngewbha ïa ki khynnah ki samla bad wat kiba la rangbah ban wan shim bynta ha kane ka jingïakop ka ban sdang ha ka por 6 baje mynstep. la pynkhreh ruh ïa ki khusnam na ka bynta ki nongjop shynrang bad kynthei ha ka Open To All Category ki ban wan ha ki kyrdan ba nyngkong, ba-ar bad balai da ki song pisa kiba T. 15,000, T.8000 bad T.5000 bad consolation ba wan basaw ki ban ïoh mar T.1000. Katba ha ka Under-17 ki nongjop shynrang bad kynthei kin ïoh T. 5000, T. 3000 bad T. 2000.
Ki nongshim bynta ki lah ban leit pynrung kyrteng ïalade ha ka Rubok Sports kaba ha Motphran hajan Mahari Store. Katei ka jingïakop mareh kan sdang na SRGT Parking Lot kaba ha Polo bad yn pynkut ha Mawlai Bypass.
