Shillong, K’Lyngkot 16
Baroh ki rangïalehkai ka FC Goa, kynthup ïa u kapten jong ka kynhun ïalehkai ka India, u Sandesh Jhingan, ryngkat bad baroh ki nongïarap, ki la pdiang ïa ka jingshah ot tulop jong ki na ka bynta ka samoi ïalehkai ISL kaba lyngkot jong u snem 2025-26, kaba la thmu ban sdang naduh ka 14 tarik u Rymphang mynta u snem.
Ka kyrwoh ba la pynmih da katei ka klob ka pyni ïa ka jinglong khapnap ha kaba ka phutbol ha India ka la mad ïa ka jingïaid lynti lyngba ki jingkylla kiba bun.
Ha ka jingpynpaw ha ka ‘X’ ha ka sngi Palei, ka FC Goa ka la ong ba ka la pynlong ïa ki “jingïakren kiba shai halor ki jingeh kiba bun” bad ki nongïalehkai jong ka bad kumjuh ruh bad ki nongïarap shaphang ki katto katne ki jingeh kiba ka lympung ïalehkai ISL ka ïakynduh mynta bad kumjuh ruh ma ka hi. Ka la bynrap ba ki nongïalehkai jong ka kynhun (first team) bad ki nongïarap ki la mynjur da ka mon sngewbha ban pynduna ïa ka bainong jong ki, kaba pynpaw ïa ka jingïatylli hapoh ka kynhun ha ka por kaba eh.
“Ha ka khyllipmat jong ka jingbym thikna na ka bynta ka phutbol India, ka klob jong ngi ka la don ïa ki jingïakren kiba shai bad kiba eh shaphang ki jingeh kiba ngi ïakynduh. Kaei kaba la bud ka pynlong ka jingsngew sarong haduh katta katta,” la pynpaw katei ka klob.
Ka klob ka la pynpaw ba ki sngewnguh shibun eh na ka bynta kane ka jingleh bad ba kane ka rai ka la long kaei kaei hynrei kaba suk. Ka FC Goa ka la pynpaw ruh ba kane ka jingleh ka pyni ïa ka jinglong bad ka mynsiem ïatylli kaba ka kynhun ka don, namar ba ka klob ka long kaba kham palat ban ïa kaei kaba jia ha madan.
Ka long kaba kham palat ban ïa ki jinglehkai bad ki jingjop. Nalor u Jhingan, kane ka kynhun ïalehkai ka kynthup ruh ïa ki rangïalehkai ka ri India kum u Udanta Singh bad u Boris Singh.
Kane ka wan ha ka por ba ki klob jong ka ISL ki dang ïakynduh jingeh ha ka liang ka pisa tyngka namar ka jingktah jong ka jingpynkut noh ïa ka Master Rights Agreement (MRA) hapdeng ka All India Football Federation (AIFF) bad ka Football Sports Development Limited (FSDL) ha u Nohprah jong u snem ba la lah. Kane ka la pynlong ban hap ap kumba hynriew bnai ban pynlong biang ïa ka lympung ïalehkai.
Hadien ka jingïarap jong u Myntri ka tnat ïalehkai, u Mansukh Mandaviya, bad ka jingïakren kaba bud ryntih bad ki kynhun, mynta la pynthikna ba baroh 14 tylli ki klob ISL kin ïashim bynta ha kane ka samoi ïalehkai da kaba kheiñ lang 91 tylli ki jingïalehkai ban ïalehkai ha ka rukom ïalehkai ha ïing bad shabar ha kaba kawei pa kawei ka kynhun kan ïalehkai haduh 13 tylli ki jingïalehkai.
Ha ka rukom treikam kaba thymmai, ki klob kin hap ban bahkhlieh haduh 60% ka jinglut jingsep jong kane ka lympung, kaba la buh ba kan long T.25 klur. Ha kajuh ka por, ka Asian Football Confederation (AFC) ka la pyllait noh ïa ka kyndon ïalehkai ba donkam ban rung sha ka AFC Champions League 2, watla ki nongjop ha ka ISL league kim lah shuh ban rung hi dalade sha ka jingïalehkai group. Namar ba la jop ïa ka Super Cup, ka FC Goa kan ïoh rung sha ka AFC Champions League 2.
