Shillong, K’Lyngkot 16
Ka Youngstars bad ka Ages ki la jam sha ka semi final ha ka Third Division Cricket League 2026 ba la pynïaid da ka Shillong Cricket Association (SCA), hadien ba ki la khur jingjop ha ka sngi Thohdieng.
Ha kane ka jingïakhun quarter final kaba la long ha madan jong ka MCA ha Polo, ka Youngstars ka la pynliem noh ïa ka United Brothers da 81 run. Ka Youngstars ka la kam trai ba kan tied nyngkong ha kaba ka la kamai 219 run bad shah pynhap 3 wiket ha ki 20 over. Kane ka la wan lyngba ka jingïalehkai bha u Asik Alam uba la khyrwit ïa ka shiteng spah run kaba 65 na ki 30 bol bad u Arav Baraily uba la ïoh 51 run na ki 23 bol. Katba u Piyush u la khur 1 wiket na ka bynta ka United Brothers.
Haba wan beh ïa ka thong, ki nongtied ka United Brothers ki la shah pynkhyllem lut baroh na ka bynta ban kamai 138 run ha ki 17.2 over. U Rehan Kharbuli u la tied 26 run na ki 11 bol bad u Ganesh Sunar u la ïoh 23 run na ki 35 bol. Katba u Prateek Kumar Rajak bad u Ayush ki la khur mar 3 wiket na ka bynta ka Youngstars. Ïa ka nam Player of the Match la khur da u Arav Baraily, uba la tied 51 run bad shim 3 wiket.
Haba phai sha kawei pat ka jingïakhun kaba ar, ka Ages ka la jop da 5 wiket ïa ka NAWS. Ka NAWS kaba la shimti ban tied nyngkong, ka la kamai 119 run bad shah pynhap 10 wiket ha ki 19.1 over. U Sumit Paul u la tied 40 run na ki 45 bol bad u Kamal Goshwami u la ïoh 12 run na ki 13 bol. Katba u Rongsang Sangma u la khur 2 wiket na ka bynta ka Ages.
Haba wan shimti ïa ka pali kaba ar, ka Ages ka la lah ban kynjoh sha ka thong ha ki 14.1 over da kaba kamai 120 run bad shah pynhap 5 wiket. U Drabest Marak u la tied 34 run na ki 14 bol bad u Bartha u la ïoh 33 run na ki 25 bol. Katba u Balaji u la khur 2 wiket bad ïa ka 1 wiket la khur da u Akhil. Ïa ka nam Player of the Match la khur da u Bobier Sangma.
