Shillong, K’Lyngkot 16
Ka All Meghalaya Karate Do Associa -tion (AMKA) ka la sei haduh 68 ngut ki nongïalehkai kiba la mih na ka nongbah ban leit shim bynta sha ka 43rd JKA India National Programme bad ha kane ka kynti, ki jingïakhun kin long ka 43rd JKA India National Karate Champion-ship & Camp 2026, bud sa ka 13th JKA India Veteran Tournament 2026 bad ka 18th JKA India Kyu Level Tournament 2026, ka ban long naduh ka 16 haduh ka 20 tarik mynta u bnai ha Maligaon, Assam.
Ïa kane ka kynhun la ïalam da u Bah Banshanlang Kharumnuid, Bah Donboklang Lyngdoh, Bah Greater E. M. Kharpuri, u Arjun Sewa, bad u Sharai Nongneng Shanpru.
Napdeng kine ki nongïashim bynta, 26 ngut na kine kin ïadon bynta ha ka prokram ïakilan ne ka training programme ban wan ban ai jinghikai da u Shihan T. Taniyama, 7th Dan, JKA Headquarters Instructor na Japan.
Nalor kata u Bah Banshanlang Kharumnuid ryngkat u Bah Donboklang Lyngdoh kiba long ki nonghikai karate ba la rangbah ha ka kam, kin kiew rynsan ba kin aireng ha ka 13th JKA India Veteran Tournament 2026.
Haba ïadei bad kane, na ka liang ka AMKA ka phah ïa ka kyrwoh kitbok ïa kane ka kynhun bad hynne ka sngi, shwa ba kane ka kynhun kan mih na ka nongbah, u Secretary Bah Ksan Kupar Warjri, da lade u la hiar sha SRGT Parking Lot Polo ban kitbok ïa kane ka kynhun bad kyrmen ba ka jingleit ïashim bynta ka kynhun kin wanrah ïa ka nam bad ka burom ïa ka synjuk bad ïa ka jylla hi baroh kawei.
