Ki surok ha Meghalaya ki dei shisha ki bakyrpang namar lah ban khoh ïa ki wat tang da ki kti suda khlem da donkam ïa ki lyngka lane puh shilum. Ïa kane ngi la sakhi lyngba ki dur khih kaba la ring da ki riew paidbah la ïohi ba ki lah ban khlong da ka kti ia ka surok Nongpoh-Umden-Sonapur kaba dang shu siang thymmai kaba hap ha Nongpoh konstitwensi, Ri-Bhoi District. Kane ka surok ka dei shi bynta na ka surok kaba 58.6 km Nongpoh-Umden shaduh Sonapur bad ka jingmang pisa ka long T. 49.53 klur, kaba la pyntrei ruh da ka kompani Dhar Construction. Ka jingmang pisa ka Sorkar Jylla ban shna thymmai ïa kane ka surok ka la pynkmen ïa ki paidbah hynrei haba la ïaid shakhmat ban trei ïa ka kam ka la pynsngewsih ïa ki paidbah namar ha kawei na ki bynta jong kane ka surok kaba la siang, ka rong ka shong hajrong kaba la pynlong ïa ki riew paidbah ban lah ban khlong da ka kti.
Ngi ai jingkhublei ïa ki ‘riew paidbah kiba la ring da ka dur khih jong katei ka surok namar la ïoh lad ban pyni ïa ka rukom pyntrei ïa kane ka surok bakongsan da ka pisa paidbah. Ngi sngewdei ban kyntu ïa ka Sorkar ba kan phah tohkit halor ka jingpyntrei ïa kane ka surok bad ban phah peit bniah biang ïa ki bynta ba la dep ban shna khnang ban lap ïa kino-kino ki jingbym biang. Kane kam dei ka sien banyngkong ba ki paidbah ki la lah ban khlong tang da ki kti suda ïa ka surok rong. Ha ki khyndiat snem mynshwa ruh ki la don kiba la ring da ki dur khih ban pyni ïa ka jinglong jingman ki surok ha kiwei pat ki bynta jong ka jylla. Dei hok ba ki surok ki tor kloi namar ka jingtorti bad ka jingbym shimkhia ki nongshna. Haba ki sngewthuh bad ki tip ba ka dei ka pisa paidbah ba ki pyndonkam watla katta ruh kim don jingsalia ban ai da kaba sniew tam sha ki paidbah.
Ha ki snem kiba la leit, ngi kynmaw ruh ba lyngba ki dur khih kaba la ring da ki riew paidbah la ïohi ba ki lah ban khlong da ka kti ïa ka surok kaba dang shu siang ha ka thaiñ Mawlaingut kaba hap ha Sohïong konstitwensi, East Khasi Hills, kumjuh ruh ha kiwei kiwei ki bynta, ha kaba la lap ba imat kiba ïoh ban pyntrei ïa ka surok, ki la shu leh tang dep ïa ka kam khlem pyrkhat shuh ïa ka bit ka biang jong ki nongleit nongwan la kan long kaban pynhun ne ka ban pynkyrtoh kylla pat.
Lah ruh ban pynkynmaw ba ha u snem 2023, ngi la sakhi ïa ka jingmih paidbah ban pyrshah ïa ka jingbym maramot ïa ka surokbah National Highway – 6 ha kaba ki paidbah ki la pynlong da ka jingkhwai bad jingthung kba ha ki bynta kiba la kylla kum ki pung bad ki pynthor. Hynrei kane ruh ka dei ka pharshi ban siat ïa ka National Highways Authority of India (NHAI) halor ka jingbym leh eiei ban shim ïa ki sienjam ba donkam ban maramot noh ïa kane ka surok.
Ngi sngewdei ban kyntu ïa ki nongshong shnong kiba sah ha ki bynta jong katei ka surok bad ki jaka bamarjan ba kin leit ai da ka jingujor sha ki bor ba dei khmih ban pynpaw ïa ka jingpyntrei torti ïa katei ka surok. Ngim lah ban shu sngap bad peitkai ïa kiba kum kine ki jait kam namar ka jingpynlut pynsep ka dei beit na ka pla jong ki paidbah kiba siew khajna sha ka Sorkar bad ym da ka pisa shimet jong no re jong no. Lada don kiba leit sha ïingbishar halor ki surok, ngin don ka jingkyrmen ba kan sa wanrah jingkylla ha ka rukom shna bad maramot ïa ki surok ha kane ka jylla. Ngim sngewdon lynti shuh da kumwei bad sa tang ban leit tied ïa ki jingkhang bah jong ka ïingbishar khnang ba ka hok kan lah ban ïeng rasong katkum ki aiñ ki kanun.
