Ka jingïatip lem, ka jinglong khuid mynsiem bad ka jinglong shida ha ki jingmut jingpyrkhat watla ha kine ki sngi ka la hiar bha, hynrei dang don pat ki briew kiba dang khlaiñ ka jingïatiplem bad jinglong hok, khlem da pyrkhat ïa ka myntoi shimet ban ïoh spah da kaba suk khlem da trei shitom. Ïa kane, ngi la ïoh ban sakhi na kawei na ki khubor kaba sngew tynnad, ha kaba watla ki khmat ki la ïohi ïa ka pisa ha madan hynrei ka mynsiem kam shym la shah satia ban thep ne bam klop hynrei ban tam bad ban aiti beit-beit sha ki nongpynïaid ka Pump ba yn lah pat ban pynpoi ha ka kti jong kita kiba la kum pynhap.
Kane ka dei ka khubor ba sngewtynnad, ha kaba uwei u nongtrei jong kawei ka Petrol Pump u la ïoh tam ïa ka song pisa ba la kum pynhap da ki nongwan theh umphniang ha ka jaka thep umphniang kaba u trei bad haba u ïoh tam ïa katei ka song pisa kaba duna ne tam ïa ka 50 hajar tyngka eiei u la leit ban aiti ha ki nongpynïaid jong ka Pump. Kane ka la jia ha ka Petrol Pump D’mercy Refill Centre kaba don ha Laitjem, Upper Shillong dang ha ka taïew ba la lah bad ïa kaba la lah ruh ban ïohi lyngba ka durkhih kaba la ïoh ring da ka kor CCTV kaba la pyndait ha ka Pump ba ha ka por ba wan kawei ka kali rongsaw kaba don ïa u number ML05-X-8558, la ïohi ba u nongñiah jong katei ka kali u la mih na kali bad ïohi ba ka song pisa ka la hap sha madan.
Kum ha kane ka pyrthei kaba jur ka jingbishni, jingsngew sarong bad pihuin bad ka jingbym ïa burom shuh iwei ïa iwei, hynrei kane ka khubor kaba la pyni da u nongtrei jong ka Pump kan long shisha ka nuksa kaba bha tam sha ki nongshong shnong bad khamtam lei ban don ïa ka mynsiem ba ym ju dei satia ban i kwah ïa ka jong kiwei. Ngi ju tip ba ka jaidbynriew jong ngi, ka dei kata ka jaidbynriew tipbriew tip blei hynrei haba peit bad puson ïa ka rukom im ha kine ki sngi kiba mynta, imat sa tang katno yn sa duh noh. La ngi phai ha kino-kino ki liang, kam don shuh kata ka jingïa burom ne ka jingïapyrkhat mar kylliang kumno ban tei bad ïarap. Kumta, ngi sngew ba ka long kaba donkam ba ngin bud ïa ka nuksa jong une u nongtrei Pump ban don ïa kata ka mynsiem pyrkhat lem. Katno kan long shisha ka jingkmen ïa kito kiba la kum pynhap ïa ka pisa bad tang kito kiba pynhap kin sngewthuh shisha ïa ka jingkordor jong ka, ha kum katei ka por ba ki pynhap.
Kham ñiar kum ha kane ka juk ban dang lap ïa kiba kum kitei ki briew ban don ka mynsiem pyrkhat lem ïa kiwei. Kum ha kane ka juk kaba mynta, la ïohi ba kat nang shai ka pyrthei katta ngi nang phet sha ka jingdum. Ngi ju ong ba ngi dei ruh ka jaidbynriew kaba leh khuid, hynrei kane mynta ka la long beit tang hapoh ki saw kynroh jong ki ïing, katba shabar ngim don shuh ka jingpyrkhat hynrei ban shu bret pathar ïa ki jaboh jabaiñ ne ki ñiut ki ñier kat shaba lap ba shem. Haba ïaid ha ki surok syngkien ha kino-kino ki bynta la ka dei ha nongbah Shillong ne shabar ruh kumjuh, yn lap beit ïa ka jingbret pathar ïa ki jaboh ne ki bilor kyiad, bilor um, ki song chip bad kiwei-kiwei ha ki rud surok. Ym lah ban sngewthuh ne tip ba balei haduh katne. Katno ka I pynsaitmet bad pynjah burom ïa ka shnong ka thaw. Kum ki nongshong shnong, ngi hap ban shim ïa ka jingkitkhlieh ban peit ba kum kine kiei-kiei kin nym jia ne ban nym long ruh ka nuksa ïa kiwei pat.
