Guwahati, K’lyngkot:
Ka jingkhanglad ha ka por miet ha ka surok bah 306 ka la pynlong ban kurup ïa ka song kaba heh jong ki dawai yaba ha ka Elaka Cachar jong ka Assam, kaba la pynlong ïa ka jingshah ktah kaba khraw ha ka kam khaïi drok hapdeng ki jylla.Da kaba pyntreikam katkum ki jingtip ba kyrpang, ki shipai Assam Rifles bad ka Directorate of Revenue Intelligence (DRI) ki la pynlong ïa ka jingkhynra lang ha ka 20 tarik bad ki la pynsangeh ïa ar tylli ki trok Tata kiba la suba ba ki kit ïa u drok.
Ha kane ka jingtalasi la pynlong ïa ka jinglap ïa ki 1,30,000 tylli ki dawai kuli yaba, kiba la antad ba ki shongdor haduh 39 klur tyngka ha ka ïew beaiñ. La kem ïa ki lai ngut ki briew, kiba baroh ki dei ki nongshong shnong jong ka Tripura, ha katei ka jaka. La kurup ruh ar tylli ki mobile phone kiba la lap ha kti jong ki kum shi bynta jong ka jingtohkit, la ïathuh ki heh sorkar.
Ki bor pynïaid ki ngeit ba ïa katei ka mar la pynkit lyngba ka lynti ïaid Cachar, ka lynti kaba donkam bha kaba pynïasoh ïka Assam bad ki jylla ba marjan bad ka thaiñ Shatei-lam-Mihngi. Ka jingtohkit kaba kham bniah ka dang ïaid shakhmat ban wad ïa ka tynrai jong ki drok bad ban lap ïa ka jingïadei bad ka kynhun khaïi drok kaba kham heh.
Ki tnad pahara ki la ong ba kane ka jingïoh kurup ka pynpaw ïa ka jingbteng ban pyndonkam ïa ka surok bah jong ka Assam da ki kynhun khaï drok ba la pynbeit ryntih. Ka Assam Rifles, kaba la pynjur ïa ka jingpeitngor bad ka jingïatreilang ha kylleng ka thaiñ, ka la batai ïa kane ka jingleh kum ka sienjam kaba kongsan ban pynthut ïa ki rukom pynpoi drok kiba treikam lyngba ka thaiñ ba shaphang Shathie jong ka Assam.
