Nongstoiñ, K’Lyngkot 21
Ka Nongpyndeng Sport Social & Cultural Club ha ka sngi Saitjaiñ ka la plie ïa ka jingrakhe ïa ka jingdap 50 snem ne ka Jubili Ksiar jong ka klob naduh ba la seng ïa ka ha u snem 1976.
Lah ban kdew hangne ba ka Nongpyndeng Sport Social & Cultural Club ka dei kawei na ki klob kaba la prat lynti kumno ban sdang bad kyntiew ïa ki kam ïalehkai hapoh Nongstoiñ, West Khasi Hills District khamtam eh na ka bynta ka Football, Cricket bad kiwei-kiwei ki jait jingïalehkai kiba la suhthied mynta ha ki samla jong ka dong ka thaiñ.
Ha katei ka sngi u Bah Gabriel Wahlang, MLA ka Nongstoin Constituency ula long kum u kongsan, ha ryngkat ka jingïadonlang u Bah Dressar Marngar kum u symbud kongsan, u Myntri ka shnong Mawkhlam- Nongpyndeng u Bah Balentin Sohlang, u Secretary shnong Bah A.L Syiem, u Lyngdoh ka shnong u Bah F. Sohlang, u President ka NSS&CC u Bah J.R Diengdoh, u Dr. L.L Mawsor, Secretary jong ka klob bad kiwei ki riew rangbah ryngkat ki nongshong shnong.
Na ka liang u Bah Gabriel u la pynpaw ba ka jingdon jong kane ka NSS&CC ka la kyntiew shibun ïa ki sap ki phong jong ki samla ha ka shnong bad ka dong ka thaiñ.
Ha kaba ïadei bad ka jingdonkam jong ka klob, utei u MLA u la kular ban ai ka jingïatreilang na ka bynta ban pynïoh ïa ki skhim na ka sorkar bad u la noh synñiang ruh na ka bynta kane ka klob.
Katba na ka liang u Bah Methodios Dkhar, Myntri ka tnat Food and Civil Supply, watla um shym la lah ban ïadon bynta lang ha katei ka sngi, hynrei u la phah ïa u kyrwoh kitbok na ka bynta ka katei ka klob bad ai ruh ka jingïarap na ka bynta ka NSS&CC.
Ha katei ka sngi la pynshongkun ruh ïa katei ka prokram lyngba ki jingshad tynrai, ki jingrwai, ka Dancing Competition, Food Fest, Penalty Shoot out bad kiwei pat ki jingïalehkai pynbyrngia kiba la khring bad pynsngew tynnad ïa ki paidbah nongwan peitkai.
