Shillong, K’Lyngkot 22
Kum shi bynta ban rakhe ïa ka National Voters’ Day kaba 16, ka ophis jong u Sub-Divisional Officer (Election), Amlarem Sub-Division kan pynlong ïa ka jingïakop mareh ba la tip kum ka “Run for Democracy” mynta ka sngi Thohdieng ha ka por 6 baje mynstep.
Kane ka prokram ka thmu ban kyntiew ïa ka jingïatip paidbah shaphang ka jingdonkam jong ka jingïashim bynta paidbah ha ka synshar paidbah (democracy), bad ban pynshlur ïa ki nongshong shnong, khamtam ïa ki samla, ba kin shim bynta shitrhem ha ka jingthep vote bad ha ka jingïakop mareh.
Katei ka jingïakop mareh kan sdang na ka khyrdop hakhmat jong ka SDO (Civil) Office, Amlarem. Ki nongshim bynta kin dei tang ki nongshong shnong bad ki nongthep vote jong ka 7-Amlarem (ST) Assembly Constituency, bad yn pdiang tang 70 ngut ki nongshim bynta kiba lah ban wan pynrung kyrteng kham kloi.
Na bynta ki Junior bad Senior (shynrang bad kynthei), ka lynti jingïaid mareh kan long na SDO (Civil) Office sha Ladjaplem bad phai biang sha SDO Office. Na bynta ka Sub-Junior category (ki khynnah hapoh 14 snem), ka lynti kan long na SDO (Civil) Office sha ka ophis jong u Block Development Officer, Amlarem C&RD Block bad phai biang sha SDO Office. La pynkhreh ruh ïa ki khusnam na ka bynta ki nongjop bad ba wan ba-ar.
Te kumta la wer ïa baroh ki nongshong shnong kiba lah ban shim bynta ban wan jingïadon bynta ha katei ka prokram khnang ba ka jingrakhe ïa ka synshar paidbah bad ban pynkhlaiñ ïa ka jingïatip paidbah shaphang ka hok jingïathep vote ha kane ka thaiñ.
