Guwahati, K’lyngkot:
Kumba la thoh ha ka khubor, la ong ba haduh mynta, kam shym la mih shuh ka jingïakynad kaba thymmai ha Kokrajhar distrik kaba don ha ka bynta ba shaphang Sepngi jong ka Assam ha ka sngi Balang, shi sngi hadien ba ka la don ka jingïakynad paidbah na ka jingjia aksiden kaba la wanrah ïa ka jingïakynad paidbah, ha kaba kane ka jingïakynad ka la shim ïa ka jingim jong arngut ki briew. Haduh mynta ki pulit ki la kem haduh 20 ngut ki briew ha kaba ïadei bad ka jingïakynad.
Ki heh jong ka distrik, ki la ïathuh ba ka jinglong jingman ha Karigaon-ka jaka ba jia ka jingkulmar bad jingthang ha ka miet jong ka lah sngi U Blei bad ka sngi Ba-ar, ka la don hapdeng ka jingshah tehlakam. Kumba la wad bniah, la ong ba uwei na kiba la shah pynïap u dei na ka jaitbynriew Bodo, katba uwei pat, u dei u samla Adivasi, uba dei na ka jaitbynriew Santhal.
“Ki hukum ba khang pyrshah katkum ka kyndon 163 jong ka Bharatiya Nagarik Suraksha Sanhita ki dang treikam ha kane ka distrik naduh ka sngi Ba-ar. Ka jingpynsangeh treikam ïa ka Internet Mobile ha Kokrajhar bad ki distrik ba marjan jong ka Chirang ruh ka dang bteng shipor” ong uwei u heh sorkar.
Kum shi bynta ban khanglad ïa kino kino ki jingjia jingïakynad kiba kham jur bad ka jingbteng jong ka jingïap briew, ki bor ba dei khmih, ki la buh ban pyntreikam da ka kynhun shipai ka tnat Army ha ki jaka kiba kham buh jingma ha Kokrajhar distrik kaba ha Assam, hadien ba la don ka jingïap jong arngut ki briew ha ka jingïakynad paidbah, kaba la wanrah ïa ka jingthang ding bad ka jingïakynad kaba la kynnoh ba ka dei hapdeng ki jaitbynriew Bodo bad ki Adivasi, la ïathuh ki heh sorkar ha ka sngi Balang.
Ki shipai ka tnat Army ki la pynlong ïa ka jingpahara ryngkat bad ka bor pynïaid distrik ha ki jaka ba shah ktah jong ka Karigaon bad ki jaka ba marjan jong ka ha ka miet jong ka sngi Balang.
La rai ban pynlong ïa ka jingïaid pahara jong ki shipai ha kane ka thaiñ ha kane ka sngi, kum shi bynta ban pynskhem ïa ka jingshaniah. Baroh saw tylli ki kynhun shipai ki don mynta ha katei ka distrik, la ong u nongaiktien.
Ka jinglong jingman baroh kawei ka don hapoh ka jingpynïaid, bad la buh ïa ki lad jingïada kiba pyrkhing bha ha Kokrajhar bad ha Chirang distrik ba marjan, la ïathuh ki heh sorkar.
U Myntri Rangbah ka jylla, u Himanta Biswa Sarma, kham hashwa, u la ong ba ki jingpynbeit, ki don ha ka jaka ban buh ïa ki shipai, katba ki shipai Rapid Action Force (RAF), ki la don lypa ha katei ka jaka, hadien ka jingïakynad jong ki paidbhur bad ka jingïakajia.
Ha ka miet jong ka lah sngi U Blei, kawei ka kali kaba don lai ngut ki Bodo ka la tynrah ïa arngut ki Adivasi ha surok Mansingh kaba don hapoh ka Karigaon outpost, ong u heh jong ka tnad kam pohïing ka jylla.
La ïathuh ba ki lai ngut ki Bodo ki la shah shoh ha ki nongshong shnong Adivasi kiba marjan, bad la thang ïa katei ka kali.
Uwei u briew u la khlad noh ha katei ka por, katba uwei pat u la khlad noh na ka jingmynsaw ha ka sngi Ba-ar, u la ong bad bynrap, lai ngut kiwei pat kiba mynsaw ki dang shah sumar ha hospital.
Ha ka sngi Ba-ar, ka jinglong jingman ka la nang jur bha ha kaba ki jaitbynriew Bodo bad Adivasi ki la khang ïa ka surok bah National Highway kaba don marjan bad ka jaka sah jong ki pulit Karigaon, ki la thang ïa ki tyndong kali, ki la thang ïa ka ophis sorkar bad ki la hiar thma ïa ka jaka sah jong ki pulit ha Karigaon, ong u heh sorkar.
Ki pulit ki la bom lathi ïa ki nongïakhih bad ki la siat da ki bom pynsat khmat ban pynpra ïa ki paidbah, ha kaba katto katne ngut ki briew, kynthup ïa ki katto katne ngut ki pulit, ki la mynsaw, u la ong.
Ka Kokrajhar distrik kaba don ha ka thaiñ ba shaphang Sepngi jong ka jylla Assam ka la shah ktah na ka jingmih ka jingkulmar kaba jur hadien ka jingshah pynïap beiñ jong uwei u samla, kaba la pynmih ïa ki jingïakhih kiba la saphriang, ka jingthang ding, bad ka jingpynthut ïa ka jingim kaba man ka sngi ha ki lynti ïaid ba kongsan jong ka leit ka wan khamtam ha ki surok.
Kane ka jingjia ka la ktah jur ïa ki jinglong jingman bad ka shongsuk-shongsaiñ, kaba la pynlong ïa ki shipai ba kin pynkhlaiñ ïa ka jingpahara bad ban ïaleh katba lah ban pynphai ïa ka jingsuk. Kumba la sakhi, la ong ba ka jingïap briew kum ha kane ka jingjia ka la kiew sha ki arngut.
