Nongstoiñ, K’Lyngkot 22
Ka Nongstoiñ District Sports Association (NDSA) ka la aidaw ba ka jingbym lah ban pynlong ïa ki lympung ïalehkai phutbol jong u snem ba la lah, ka dei na ka daw ba ka Meghalaya Football Association (MFA) kam shym la ai jingtip eiei la kan pynlong ne em ïa ka Meghalaya State League (MSL) jong u snem 2025.
Kum ka kyrwoh ba la pyllait da u President ka NDSA u Bah B.S. Kharlor u la pynpaw, “Kawei ka daw ïa kaba ka NDSA kam shym la pat lah ban pynlong ïa ki lympung ïalehkai ka dei namar ba ka MFA haduh mynta kam shym la lah ban ai jingtip la kan pynlong ne em ïa ka MSL 2025, namar ka Mawlarshong SC kaba dei ka lahduh jong ka Super Division ka samoi ïalehkai 2024.”
U la ong ba ka NDSA haduh mynta ka dangap bad lada yn sdang da kawei pat ka lympung ïalehkai kan buh jingeh ïano kan phah kum ka lahduh, hynrei dei tad lada ka MFA kan pynbna ba kin nym pynlong shuh ka mut ka la suk bad kan ïaid beit da kaba thymmai.
Shuh shuh u Bah Kharlor u la ong ba sa kawei pat ka daw ka long ba na ka liang ka NDSA ka dang don ka jingïapynbeit na ka bynta ka madan jong ka NDSA bad ka Sorkar Jylla bad kawei pat ka daw ka dei namar ka jingduna ha ka jingmang pisa.
Lah ban kdew ba katei ka jingbym lah ka NDSA ban pynlong ïa ki lympung ïalehkai jong u snem la lah kynthup lang ruh ïa ka Super Division ka la buh jingeh ïa ki rangïalehkai kumno ba kin nangpynjanai ïa la ki sap ïalehkai jong ki.
Te kumta halor katei ka jingbym lah ban pynurlong ka NDSA, ka la pynlong ïa ka Khasi Student’s Union (KSU) West Khasi Hills ba kan mih shakhmat da kaba ka la kyntu ba kan shim kha ban pynlong ïa katei ka lympung jong u snem 2025 khnang ba kan ym ktah ïa ki rangïalehkai bad kumjuh ïa ki klob bapher bapher kiba hap hapoh katei ka synjuk.
