Shillong, K’Lyngkot 22
Ka Lawsohtun ka la long ka kynhun kaba nyngkong ban jam sha ka final ha ka First Division Cricket League 2026 ba la pynïaid da ka Shillong Cricket Association, hadien ba ka la pynliem noh ïa ka United da 2 run ha ka sngi Palei.
Ha ka jingïakhun semi final kaba nyngkong kaba la long ha madan ïalehkai jong ka MCA ha Polo, ka Lawsohtun ka la kam trai ban tied nyngkong ha kaba ka la kamai 185 run bad shah pynhap 10 wiket ha ki 39.3 over. U Chongtre Lamare u la tied 40 run na ki 35 bol bad u Hilar Thabah u la ïoh 22 run na ki 44 bol. Katba u Bijon Dey u la khur 4 wiket bad ïa ki 2 wiket la ïoh da u Yogesh Tiwari na ka bynta ka United.
Haba wan beh ïa ka thong, ka United ka la kamai tang 183 run bad shah pynhap 10 wiket ha ki 40 over. U Bijon Dey u la khyrwit ïa ka shiteng spah kaba 63 run na ki 98 bol bad u Yogesh Tiwari u la ïoh 20 run na ki 25 bol. Katba u Hilar Thabah u la khur 3 wiket bad ïa ki 2 wiket la ïoh da u Greatest Lyngkhoi na ka bynta ka Lawsohtun. Ïa ka nam Player of the Match la khur da u Hilar.
