Shillong, K’Lyngkot 22
Ka kynhun ïalehkai phutbol ka Jylla ka la sdang da ka jingjop ha ka wat kaba khatduh jong ka 79th Senior Men’s National Football Championship na ka bynta ka Santosh Trophy 2025-26, hadien ba ka la pynliem noh ïa ka Odisha da 1-0 kol ha Silapathar Football Stadium, Assam.
Kane ka shi kol ka la wan urlong lyngba u rangïalehkai ka Shillong Lajong u Baby Sunday Marngar ha ka minit kaba 23 ka Meghalaya kaba la wan ba-ar ha u snem 2022-23 ka la khur ïa ki lai poiñ ha ka Group-B.
Kane ka jingïalehkai ka la long kaba itynnad bad kaba ïakhaid bha, ha kaba baroh ar ki la ïoh ïa ki kabu kiba biang. U Dawanchwa Carlos Challam u la ïoh ban pynbuh bol na ka bynta u Ïohborlang Lyngdoh, hynrei ka jingshut jong u ka la her shabar. Kumjuh ka Odisha ka la ïoh ïa kabu ksiar lyngba u Jitu Muduli, hynrei um shym la lah ban thep kol.
Hynrei ha ka minit kaba 14, ka Meghalaya ka la ïoh biang lyngba u Ïohborlang uba la ïarap pynbuh bol na ka bynta u Deibormane Tongper, hynrei um shym la lah pat ban pynurlong. Kane ka jingïai pyrshang ka la wan urlong ha ka minit kaba 23 ha kaba u Baby Sunday u la ïoh ïa kabu kaba biang kaba um shym la pynlehnohei ïa kane ka kabu ksiar.
Wat hapdeng kane ka jingïakhun, ka Odisha kam shym la lah ban pynphai bad ha kaba kut ka la mad ïa ka jingshah rem. Te kumta ka Meghalaya kan pynkhreh ïa ka jingïakhun kaba ar pyrshah ïa ka Punjab ha ka sngi Saitjaiñ.
Haba phai sha kiwei pat ki jingïakhun jong kane ka group, ka Kerala ka la pynliem noh ïa ka Punjab da 3-1 kol, katba ka Services ka la ïakhaid mar 1-1 kol bad ka Railways.
