Imphal, K’lyngkot:
Ka jingjia jong ka jingshah pynïap jong uwei u briew na ka jaitbynriew Meitei uba la shah siat ïap hadien ba u la shah rahbor ha ki suba lehnoh Kuki ha ka District Churachandpur jong ka Manipur, ka buh jingma na ka jinglah ban khie thymmai biang ki jingïakynad ha ka jylla, la ong ka lad phah khubor.
Ka durkhih ka la paw ha ka rukom kaba ishyrkhei bad kaba isangsot, naba la ïohi ïa une u briew uba la kyrpad sngewrit na ka bynta ban pynsah ïa ka jingim jong u hashwa ba un shah pynïap.
Ïa une u briew uba la shah pynïap la tip kyrteng kum u Mayanglambam Rishikanta Singh, une u la shah tan na ka ïing sah jong u ha ki thaiñ Tuibong ha ka sngi Balang.
Ïa ka met ïap jong u la lap hajah ka shnong Natjang.
Ki pulit ki suba jur ïa ka jingdonkti jong ki dkhot jong ka kynhun United Kuki National Army (UNKA), ka kynhun lehnoh Kuki kaba dei ka kynhun lehnoh ka bym shym la ïasoi ne ïatehkular bad ka Suspension of Operations (SoO).
Ïa kane ka SoO Pact la ïasoi hapdeng ka sorkar pdeng, ka sorkar Manipur bad katto katne ki kynhun kieng atiar Kuki-Zo.
U Singh, u dei u nongshong shnong jong ka Kakching Khunou ha ka Elaka Kakching bad u la shong kurim bad kawei ka kynthei Kuki na Churachandpur kaba kyrteng ka Chingnu Haokip bad u la shim ïa ka kyrteng riewlum Ginminthang.
Katkum ki tyllong khubor na kane ka thaiñ, la ïathuh ba u la wanphai sha Churachandpur na Nepal ha ka 19 tarik, Kyllalyngkot bad u dang sah bad ka kurim jong u da ka jingmynjur jong ki katto katne ki kynhun na kane ka thaiñ.
Kine ki shijur ki la shah rahbor lang bad shah ïalam sha ka jaka shwa ban poi ha ka shnong Natjang, ha kaba u Singh u la shah siat ïap, la ïathuh ki pulit. Hadien la pyllait noh ïa ka kurim jong u.
Ki pulit ki la buh jingujor bad pynlong ïa ka jingkhynra ban lap bad kem ïa kiba donkti.
Ka jingïakynad jaitbynriew hapdeng ki jaitbynriew Meitei bad Kuki, kaba la sdang ha u bnai Jymmang 2023, ka la pynlong ïa palat 260 ngut ki briew ban ïap bad pynkynriah jaka da ki hajar ngut.
Ka jingleit jingwan hapdeng ki jaka ba la synshar da ki ar tylli ki jaitbynriew ka dang shah pyrkhing bha.
