Guwahati, Rymphang:
U Myntri ka tnat ki kam pohïing jong ka sorkar pdeng, u Amit Shah, ha ka 30 tarik u Kyllalyngkot, u la pynkhlaiñ ïa ka jingïakhun ilekshon jong ka BJP na ka bynta ka elekshon sha ka Ïingdorbar Assam ka ban wan, da kaba pynbna ba ka seng kan ïakhun ïa ki ilekshon halor ki arliang mamla jong ka roi ka par bad ka jylla kaba shngaiñ, katba ka dang pynlong ïa ka jingkynthoh jur ïa ka Congress halor ka jingwan rung tuh, ka jingduna briew bad ka jingbym lah ban synshar. Ha ka jingleit jngoh kaba ar sngi sha Assam, u Shah u la pynlong ïa ka jingïalang kaba khang, kaba ar kynta bad ki heh nongïalam jong ka BJP bad ki nongkitkam, ha kaba u la batai ïa ka buit treikam ha ka ilekshon jong ka seng.
Haba pyntip sha ki nongthoh khubor hadien kata, u President ka BJP ha Assam u Dilip Saikia u la ong ba u Shah u la tyrwa ïa ki jingai jingmut kiba kordor katkum ka jingshemphang jong u ha ka elekshon bad u la kyntu ïa ka tnat jong ka jylla ban pynthikna ïa ka jingjop kaba khraw bad ban ïoh kham bun ki seat ban ïa ka elekshon sha ka Ïingdorbar Thaw Aiñ kaba la dep.
U Saikia u la ong ba yn sa pynkut noh shen ïa ka plan treikam ban bat ïa ka bor synshar ha ka sien kaba lai lynter.
Haba kren ha ki jingïalang paidbah ha Dibrugarh bad Dhemaji, u Shah u la kynthoh ïa ka Congress ba ka pynshlur ïa ka jingwan rung kyrthep na ka bynta ban ïoh jingmyntoi ha ka elekshon bad u la kam ba ka jingbun briew jong ka Assam ka la shah pynkylla khlem lah ban pynkylla ha ka por ba synshar ka Congress.
U la kynnoh ba ka jingdon jong ki nongwan rung tuh ka la kiew sha ka 64 lak ngut bad ba ki la kylla long ka jingbun paid ha ki hynñiew tylli ki distrik, da kaba pynskhem ba ki sorkar ba la ïalam da ka BJP ha ka sorkar pdeng bad ha Assam mynta ki trei ban pynphai kylla ïa kane ka jinglong jingman.
U Shah u la ong ba ka jingwan rung tuh ka la pynthut ïa ka jingshngaiñ jong ka ri bad ïa ka imlang sahlang jong ka Assam bad u la ban jur ba dei ban pynsangeh noh shi syndon ïa ka.
U la kyntu ïa ki nongthep vote ban pynkhlaiñ ïa ki kti jong u Myntri Rangbah ka jylla u Himanta Biswa Sarma da kaba jied biang ïa ka BJP, da kaba pynshisha ba ka sorkar jylla ka la pyllait ïa ka jaka kaba 1.26 lak akar na ka jingrung bad shong shnong ki briew ba la rung beaiñ.
U la pynpaw ruh ïa ka bynta jong ki jaitbynriew trai ri trai muluk khamtam ki jaitbynriew Mising ban khanglad ïa ki nongwan rung tuh ban wan buhai shnong ha Upper Assam. Haba kynthoh jur ïa ki nongïalam ka Congress, u Shah u la kynthoh ïa u Rahul Gandhi um burom ïa ka thaiñ Shatei-lam-Mihngi bad ong ba ka Congress kam don eiei ban tyrwa ïa ka Assam lait noh tang ka jingkulmar, ka bamsap bad ka jingbym shngaiñ.
U la kynnoh ba ha ki phew snem jong ka jingsynshar ka Congress, ka Assam ka la ïoh tang khyndiat eh ka jingkiew, da kaba pynïapher ïa ka bad kaei kaba u la batai kum ki jingkylla kiba pynkylla dur hapoh ka jingïalam jong u Myntri Rangbahduh ka ri, u Narendra Modi.
U Shah u la jer kyrteng ïa ki katto katne ki jingtei bad ki kam pynroi ba la shim da ki sorkar BJP, kynthup ïa ki surok, ki jingkieng, ki jaka sumar bad ki projek karkhana, da kaba pynskhem ba ka roi ka par ka la poi sha ki jaka riewlum bad ki bym dei riewlum.
U la ong ba ka jingthmu jong ka BJP na ka bynta ka Assam ka long ka jingroi kaba kynthup lang ïa baroh kaba la kyrshan da ka jingpahara kaba khlaiñ bad ka jingsynshar kaba kut jingmut.
U Shah u la burom ruh ïa ka pateng jong u Myntri Rangbahduh barim u Atal Bihari Vajpayee bad kynthoh ïa ka Congress halor ka jingkynnoh ba kam shym la burom ïa ki jingnoh synñiang bad ki jingangnud jong ka Assam.
U la pynpaw biang ba ka roi ka par kan dang long ka jingthmu ba kongsan jong ka BJP bad ba ka seng ka la pynkhreh pura ban ïakhun ïa ka ilekshon da ka agenda kaba shai.
Ka ilekshon sha ka ïing dorbar thawaiñ ha Assam kan long sa tang khyndiat bnai.
U Shah u la pynkut ïa ka jingleit jong u da kaba ong ba ka BJP kan ïakhun ïa ka elekshon da ka jingshaniah, da kaba pynshong nongrim ha ka rekod jong ka roi ka par, ka jinglong kaba skhem halor ka jingwan rung tuh bad ka jingkular ïa ka Assam kaba shngaiñ bad kaba roi.
