Agartala, Rymphang:
Ki shipai ka Tripura ki la pynjulor palat san lak tylli ki tynrai jingthung kiba dei u Ganja kiba shongdor T. 75 klur. Ka jingtreikam ka la long ha ka jaka kaba 170 akar ha ka khlaw Dulunga, kaba la neh haduh 8 kynta.
Ka jingpyntreikam jong ki bun tylli ki kynhun ka kynthup ïa ki pulit, ki BSF, ki TSR, bad ka tnad ba dei khmih ïa ki khlaw.
Ki bor pahara ha Tripura, ki la pynjulor ïa palat san lak tylli ki jingthung Ganja (cannabis) kiba shong dor kumba 75 klur tyngka, ha kawei na ki jingkhynra kaba heh tam ïa ka jingrep beaiñ ha ka jylla, la ïathuh ki heh sorkar.
Ïa kane ka jingkhynra lang kaba heh la pynlong ha ka 1 tarik u Rymphang ha ka jaka khlaw Dulunga kaba hap hapoh ka Sonamura subdivision jong ka distrik Sepahijala hadien ki jingtip ba kyrpang jong ki riew wadbniah. Ka jingkhynra ka la neh haduh 8 kynta, naduh ka por 8.30 mynstep haduh ka por 4.30 janmiet.
Ha kane ka jingkhynra, ki bor pahara ki la lap bad pynjulor ïa ki 92 tylli ki jaka rep Ganja ba kyrpang kiba la mih ha ka jaka khlaw kaba heh kumba 170 akar. Baroh ki jingthung ki la shah pynjulor bad shah jynrat ha katei ka jaka, la ïathuh ki heh sorkar.
Ki kynhun na Sonamura Police Station, ki pulit jong ka Sepahijala District Armed Police, ki kynhun bun kynhun jong ki shipai pahara khappud (BSF), ki shipai Tripura State Rifles (TSR), ka Sonamura Forest Division bad kiwei kiwei ki kynhun ba ïatreilang ki la ïashim bynta ha kane ka jingkhynra.
Ki heh ophisar ki la ong ba ki jingïakhih ba ïatreilang pyrshah ïa ka jingrep jingdih pynbuaid be-aiñ kin dang ïai bteng ban tehlakam ïa ka jingkhaïi drok bad ban khanglad ïa ka jingwan rung tuh bad pyndonkam bakla ïa ki jaka khlaw. Ka jingtohkit ka dang ïaid shakhmat ban lap ïa kiba donkti ha kitei ki jingthung beaiñ.
Ha ka jingkhynra kaba kyrpang ha ka 29 tarik u Kyllalyngkot, ki bor pahara ki la pynjulor ïa ki kper rep Ganja beaiñ kiba la mih ha ki jaka khlaw kiba heh haduh 65 akar ha ka thaiñ Sonamura.
Da kaba treikam katkum ki jingtip kiba lah ban ngeit, ka kynhun ba ïatreilang ka la pynlong ïa ka jingkhynra kaba khyndai kynta ha ki jaka khlaw jong ka Kamalanagar, Krishnadola, Dulunga bad Bijoy Nagar.
Ha ka por ba la pynlong ïa ka jingkhynra, ki briew ki la lap bad pynjulor ïa 41 tylli ki jaka kiba don kumba 1.80 lak tylli ki jingthung Ganja kiba la san bha, ha kaba u jingthung ba la pynjot la antad ba u shongdor kumba 27 klur tyngka.
Ha ka jingkhynra, la ïadon bynta lang ki pulit na ka Sonamura Police Station, ka 81 Battalion jong ka tnat BSF, ka kynhun 5th, 9th, 11th bad 14th Battalions jong ka TSR, ka 14th Battalion Women TSR, ka 35 Battalion Assam Rifles bad kiwei pat ki kynhun pahara.
