Surrey, Rymphang:
Katkum ki khubor, la ong ba 3 ngut ki nong India ki la shah kem hapoh Canada halor ka jingiadon bynta jongki, ha ka jingiasynreit kuli habar kawei ka jaka sah briew hapoh ka nongbah Surrey. Ia kitei ki 3 ngut la pynngat hapoh ki katto katne ki kyndon pynkheiñ aiñ jong ka jingpyndonkam bakla ia ki tiar siat bad la phah sha ka kynhun tohkit tad haduh ka 5 tarik jong une u Rymphang.
Ha ka por kumba 3:50 Mynstep, ki pulit ka nongbah Surrey ki la ioh pdiang ia kawei ka phone ha ka 1 tarik u Rymphang, halor ka jingiasynreit kuli bad jingwiang ding habar jong kawei ka jaka sah briew hajan ka surok Crescent Road bad ka surok 132 Street. Ki pulit ka tnat Surrey Police Service (SPS) kiba don hapoh ka kam ha katei ka por ba la ioh ia katei ka jingtip, ki la leit mareh mar-mar sha katei ka jaka, ha kaba ki la lap ia katei ka jingjia bad ki la ioh ruh ban kem noh ia kitei ki 3 ngut kiba don kti ha katei ka jingjia.
Ka Project Assurance ka dei ka jingthmu ha kaba ka SPS ka pahara ha ki jaka ba marjan bad ki jaka treikam ba la shah thombor ha ki kam dawa pisa bad ki jingshah siat kiba iadei bad ka dawa pisa.
“Ïa ki lai ngut kiba shah kynnoh la kem da ki ophisar jong ka SPS hadien khyndiat por hajan ka 28 Avenue bad 140 Street hadien ba ki la rung ha kawei ka kali ba ïaid lang,” la kdew ka SPS ha ka jingpynbna pathai khubor.
Kine ki lai ngut ki rangbah ki dei kiba la tip kyrteng kum u Harjot Singh (21 snem), u Taranveer Singh (19 snem), bad u Dayajeet Singh (21 snem). Baroh lai ngut ki la shah pynngat ha kawei ka jingshah kynnoh ba ki la pynbthei suloi sha kawei ka jaka katkum ka ain pynshitom bein jong ka ri Canada. Lah ban pyndap shuh shuh ia ki jingsiew ha ki sngi ban wan.
Ka tnat jong ki kam runar ba kongsan jong ka SPS ka la shimti ia ka jingtohkit bad ka la pyntreikam ia ka tnat treikam khappud jong ka Canada ha ka jingtohkit.
Ka SPS ka la pynmih ia ki dur jong ki lai ngut kiba shah kynnoh bad ka la kyrpad ia ki paidbah ba kin iasam ia ki jingtip halor kane ka jingjia, kynthup ia ki dur CCTV lane dashcam, na ka bynta ban tohkit bad leh ia kaba donkam.
“Ka SPS ka kyrmen ba ka jingpynmih paidbah ia ki dur jong u Harjot Singh, u Taranveer Singh, bad u Dayajeet Singh Billing kan pynlong ia kiwei pat ki sakhi, ki nongshah lehbein, lane ki paralok ban wan shakhmat bad ki jingtip kiba iadei ha kaba iadei bad ki kam jong uwei ne bun ngut ha ka step jong lane shwa ka 1 tarik u Rymphang,” la ong ka tnat tohkit.
Tang ha ka taiew ba la dep, kata ha ka 26 tarik u Kyllalyngkot, arngut ki rangbah nong India ki la shah kem ha kawei pat ka jingshah siat suloi. Ha ki por ba kem la lap bad kurup ia ka suloi kaba la buh load.
Kine ki arngut ki dei kiba la tip kyrteng kum u Harshdeep Singh (20 snem) bad u Hanspreet Singh (21 snem). Baroh arngut la pynngat ha ka jingshah kynnoh ba ki shong ha ka kali da kaba tip ba ka don ka suloi. U Harshdeep u iakynduh ia ka jingshah siew kaba kham heh na ka bynta ban pyniaid ia katei ka kali.
