Tel Aviv, Rymphang:
Ha ka jingïalang ban rakhe ïa ka sngi Republic Day kaba 77 jong ka India, u Myntri ka Culture and Sports jong ka Israel, u Miki Zohar, u la ong ba ka ri jong u ka kheiñ kor bha ïa ka jingïadei jong ka bad ka India, da kaba batai ïa ka India kum ka paralok ba ju ïatreilang bad ba hajan eh badka.
U Zohar ha ka Sngi Nyngkong u la ïathuh ha ka jingïalang ba ka jingrakhe ïa ka Republic Day jong ka India ruh ka la kylla long ka sngi kaba kyrpang na ka bynta ki nong Israel, namar ba ka Israel ka la pynbna ban ïoh biang ïa ki shyieng jong u nongshah rahbor ba khatduh ha Gaza na ka jingshah thombor jong ka Hamas ha ka 7 tarik u Risaw, 2023. “Kane ka sngi, ka long ka sngi kaba kyrpang naka bynta jong ngi. U nongshah rahbor ba khatduh jong ngi, u Ran Gvili, u la wan phai sha la iing. Kane ka dei kaei kaei kaba baroh kawei ka ri ka sngewkmen haduh katta katta bad ka wan ryngkat bad ka sngi kyrpang jong phi. Nga pyrkhat ba ka mut shibun shaphang ka jingiadei kaba khraw hapdeng ki ri. Ka jingkmen jong phi ka dei ruh ka jingkmen jong ngi,” la ong u myntri Israel.
Ha ka jingshah thombor kaba shyrkhei, ka Hamas ka la pyniap kumba 1,200 ngut ki nong Israel bad shim 251 ngut ki briew kiba dang im bad kiba la iap kum ki nongshah rahbor ha ka 7 tarik u Risaw, 2023. “Ka India bad ka Israel mynta ki ïasam shibun kiei kiei kiba ïadei, ruh ki jingsngewtynnat kiba ïadei bad ki jingthmu kiba ïadei na ka bynta ka lawei. Ha ki snem kiba la leit noh, ka jingïadei hapdeng ki ar tylli ki jaitbynriew jong ngi ka la nang jylliew, nang jylliew bad nang kham jylliew,” u la ong. Haba kdew ïa ka “jingtuid beit” jong ki jingleit jngoh jong ki heh hapdeng ka Jerusalem bad ka New Delhi, u myntri Israel u la ong ba kam dei tang ka rukom ïadei bad ka jingïadei, hynrei ka dei ka jingpynpaw ïa ka jingïadei kaba jan hapdeng jong ngi bad ka jingkordor kaba ngi buh ïa ka jingïadei jong ngi ha ki kyrdan ba ha khlieh duh”.
U myntri kam jngohkai pyrthei jong ka Israel, u Haim Katz, u myntri ka ioh ka kot, u Nir Barkat, u myntri ka rep ka riang, u Avi Dichter, bad u myntri pla pisa, u Bezalel Smotrich, ki la leit jngoh ia ka ri India ha u snem ba la dep, katba ki nongiatreilang ba hakhmat eh, ki dang tei ia ka bor ban ia soi ia ka jingiateh kular ha ka khaii pateng kaba laitluid.
