Paris, Rymphang:
Ka National Assembly jong ka ri France, ha ka Sngi Nyngkong ka la ai jingkyrshan ia ka jingtyrwa ban pyrkhing ia ki khynnah ba hapoh 15 snem ka rta, na ki rynsan ‘Social Media’ bad kane ka long hadien ba ka jingdon jong kitei ki jait rynsan ha kine ki sngi, ka la wanrah ia shibun kiei kiei ki jingialam bakla bad jinghikai sniew khamtam ia ki khynnah kiba dang sdang khie bad ki bym pat lah ban sngewthuh ia la ka jong ka bor bad ka buit. Namar la ong ba don shibun ki khynnah kiba la shah ktah ha ka liang ka bor pyrkhat bad kiba la shah pynthud bad shah pynthame noh ha ki jingialam bakla bad ki jingpynbyrngia jong kitei ki rynsan paidbah ha kine ki sngi.
Kumta la ong ba kane ka aiñ rew lane ka ‘bill’, ka tyrwa ban khang ïa ki khynnah hapoh 15 snem ka rta, na ki rynsan paidbah bad ki “jingtreikam jong kitei ki jait rynsan kiba kham heh bad ka pynpaw ruh ïa ka jingsngewkhia kaba la nang jur halor ka jingktah jong ki rynsan ‘Social Media’ ïa ka jinglong- jingman bad ka jingim jong ki khynnah rit.
Ki nongthaw aiñ ki la ai jingkyrshan da 116 pyrshah ia ki 23 ngut ki bym treh ban ai jingkyrshan ia katei ka aiñ rew kaba la wanrah hapoh ka iingdorbar thaw aiñ. Mynta pat katei ka aiñ rew, kan iaid sha ka Senate hashwa ban jied ia ka jingthep vote kaba khatduh ha ka iing dorbar kaba kham hapoh.
U President ka France, u Emmanuel Macron, u la kdew sha ki rynsan ‘social media’ kum kawei na ki daw ban kynnoh ba ki long kum ki kam thombor pyrshah ia ki khynnah samla. Kumta ruh u la kyntu ïa ka France ba kan bud ïa ka jinglam lynti jong kiwei pat ki ri, kum ka Australia, kaba la sdang pyntreikam nyngkong eh ia kum kane ka jait aiñ ha ka pyrthei ban khang pyrshah lane ban pyrkhing ïa ki khynnah kiba hapoh ka 16 snem ka rta, na kitei ki rynsan ‘social media’ ba kynthup ïa ka Facebook, Snapchat, TikTok bad YouTube, naduh u bnai Nohprah.
