Guwahati, Rymphang:
Hashwa ka jingwan jong ka ilekshon Assembly ha Assam ka ban sa long shen, ka seng Congress ha ka 3 tarik u Rymphang, ka la thaw ïa ka Pradesh Election Committee jong ka na ka bynta kane ka jylla, ha kaba la thung ïa u President ka Assam Pradesh Congress Committee (APCC) u Gaurav Gogoi kum u Chairman jong ka.
Katkum ka jingïathuh jong ka seng, kane ka komiti kaba don 35 ngut ki dkhot ki kynthup ïa ki heh nongïalam, ka Debabrata Saikia, u Rakibul Hussain, u Pradyut Bordoloi, u Bhupen Kumar Borah, u Ripun Borah, u Paban Singh Ghatowar, u Wajid Ali Chaudhary, Rosilina Tirkey kiwei kiwei, u Jakir Hussain Sikdar, u Pradeep Sarkar bad u Arun Dutta Mazumdar, napdeng kiwei pat.
Nalor ki dkhot ba la buh kyrteng, kane ka komiti kan kynthup ruh ïa u General Secretary (Organisation) ka APCC, ki heh jong baroh ki Frontal Organization jong ka APCC, bad ki Chairperson jong ki Scheduled Caste, kiwei pat ki kynhun jaitbynriew kiba dang sahdien, ki rit paid, ki kynhun ka Adivasi Congress bad ka Tea Garden Cell jong ka APCC.
Ka jingpynlong thymmai ïa ka Committee Election jong ka Pradesh ka dei shi bynta jong ka jingpynkhreh jong ka Congress na ka bynta ka ilekshon Assembly ka ban long ha Assam ha kine ki bnai ban wan. Ka seng ka thmu ban buh ïa ka jingpyrshah kaba jur ïa ka BJP kaba synshar bad ban ïoh biang ïa ka bor synshar ha ka jylla Shatei-lam-Mihngi.
Ki nongïalam ka Congress ki la ong ba kane ka kynhun ba dang thaw thymmai kan peit ïa ka buit treikam ilekshon, ka jingjied kyrtong bad ka jingpynïadei ïa ki kam ïalap ilekshon ha kylleng ka jylla katba ka seng ka dang pynjur ïa ka jingpynkhreh ïa ka ilekshon.
