Ki don ki kynhun balang khristan kiba shu ngeit beit ha ka jinghikai niam khlem da donkam ban dih dawai eiei. Ki don ki kynhun balang kiba ngeit bad pdiang ban dih dawai na ki doktor bad ha kajuh ka por ki dang leit phah duwai de ha ki rangbah niam kum ki phadar, ki pastor bad kiwei kiwei.
Ha ka jinglong briew ngim hun ban shu dih dawai beit na ki jingbthah ki doktor. Ngi kwah ban leit phah duwai ha ki nongleh byrtong la ki dei kiba da kñia da khyriam ne kiba shu duwai dumok da ki ktien beh ksuid beh khrei. Haba ngi shitom ngi pang ka bor met bor phad ngi hap ban wad ki lad ki lynti kumno ban pynjem ïa ka jingktha jingsuh jong ka met. Ki bym long niam ruh kim da pher na kiba long niam, ma ki ruh ki don kiba leit phah sumar ha ki doktor ki don ki bym treh ban leit shim dawai, ki shu leit phah khan phah kñia ha kiba leh byrtong byrted. Kane ka jingngeit biej ka don salonsar ha ngi ki briew kiba long niam ne ki bym long niam ruh. Ym dei ban kynnoh tang ïa kawei ka balang namar baroh ki balang ki long kumjuh. Ngi ki briew ngi ïaroh ïa u Blei, ngi pynrem ïa u ksuid u khrei. Kane ka jingngeit biej ka don beit ha kano kano ka jaitbynriew namar ngi long tang ki briew kiba tlot ha ka jingngeit.
C. B. Iawphniaw
