Imphal, Rymphang:
Ki bor pahara ha ka 24 tarik u, Rymphang, ki la kem ïa uwei u pulit langrut uba long u nongñiah jong ki pulit ka Manipur namar ba u la shah kynnoh ba u la pynrung dkhot na ka bynta ka kynhun lehnoh KCP (MFL) ba la shah ñiew beaiñ.
Ïa une uba la shahkem la tip kyrteng kum u Kongkham Sanajaoba Singh ba la tip ruh da ka kyrteng kum u Ibomcha (43) uba shong ba sah ha Utlou Chanura kaba hap hapoh jong ka Nambol Police Station ha Bishnupur District. La kem ïa u na ka jaka sah jong u ha ka por ba ki dang pynlong ïa ka jingkhynra.
Katkum ka jingïathuh jong ki heh pulit, la ong ba watla u dei u dkhot ba trei shitom jong ka tnad pulit jong ka Manipur, hynrei la kynnoh ba u Singh u trei narieh narieh kum u nongtrei ba trei shitom jong ka kynhun KCP (MFL), Kangleipak Communist Party (Military Faction) bad u la don bynta ha kaba pynrung dkhot thymmai na ka bynta kane ka kynhun seng.
Kane ka seng ka dei kaba la shah ñiew beaiñ halor ka jingdonkti jong ka ha ki kam lehnoh bad ki kam kiba long beaiñ ha ha Manipur.
Ki tyllong khubor ba la wan na ki shipai pahara ki la ïathuh ba katei ka jingshah kem jong u ka long hadien ki jingtip jong ki riew wad bniah kiba pyni ïa ka jingkynnoh ba u don ki jingïadei kum u nongïarap ha ki jingpynrung dkhot ha katei ka kynhun ki riewkieng atiar.
Ki jingtohkit ki dang ïaid shakhmat ban tip haduh katno ka jingdonkti jong u, ka jingïadei jong u, bad hato ki jingtip kiba kongsan ki la shah ktah ne em.
