Agartala, Lber:
U Myntri Rangbah jong ka jylla Tripura u Manik Saha, u la kam ba katei ka jylla, ka dei kaba duna tam ha ka jingdon ki kam runar ha u snem 2025, ha kaba ki kam runar kiba la ujor, ki la hiar da 8 percent haba ïanujor bad u snem 2024.
Haba kren ha ka Tripura Police Week parade, u Saha u la ong ba ki jingjia ba la buh jingthoh ha ki pulit ki la hiar na ka 4,033 ha u snem 2024 sha ka 3,698 ha u snem 2025.
U la pynpaw ruh ïa ka jingduna kaba 8.1 percent ha ki kam runar pyrshah ïa ki kynthei ha u snem 2025 bad u la pynksan ïa ka jingbuh ïa ki jaka ai jingïarap jong ki kynthei 24/7 ha baroh ki thanat pulit, kumjuh ruh ka jingdon jong ki khyndai tylli ki thanat pulit kiba dei tang ki kynthei ha kylleng ki distrik bapher bapher ban kyntiew ïa ka jingshngaiñ jong ki kynthei .
“Ka long kaba beit beit ka jinghiar kaba 8.20 percent, kaba duna tam ha kine ki arphew snem ba la dep ha ka jylla.Baroh ki mukotduma la ujor ha u snem 2024, ki don 4,033 tylli, katba mynta u snem ki don 3,698 tylli ki mukotduma. 14.54% ha u snem 2025 haba ïanujor bad u snem ba la dep. Ka burom ka dei ban leit sha ki pulit ka jylla bad kiwei kiwei ki bor pynïaid aiñ,” u la ong.
U Myntri Rangbah ka jylla u la pynpaw ïa ka jingpdiang ïa ki kor ki bor kiba thymmai ha ka jingpynjari aiñ bad u la ban jur ïa ka jingdonkam jong ki bor pynjari aiñ ban pynïadei bad ki rukom leh kam sniew kiba nang kiew da kaba kyntiew ïa ka jingtbit bad ka jinglah jong ki ha ka liang ka teknoloji.
U la batai ruh ïa ki jingthmu na ka bynta ki jinghikai ba kyrpang ban weng ïa ki jingeh kiba mih. Nalor kata, la wanrah ïa ka jingthmu ba kyrpang ban tehlakam ïa ka jingïaid kali kaba la khot ‘Zero Accident Programme’, ha kaba la ithuh ïa ki 16 tylli ki jaka ba ju kham jia ki jingjia aksiden bad 84 tylli ki jaka ba lah ban jia aksiden.
Kane ka jingthmu ka la wanrah ïa ka jingduna kaba 8.82 percent ha ki jingjia aksiden ha surok bad ka jinghiar kaba pawnam ha ka jingïap kaba 13 percent haba ïanujor bad u snem ba la dep, la bynrap biang u Saha.
