Guwahati, Lber:
Khnang ban pynbiang ïa ka jingbun jong ki nongleit jingleit ba la khmih lynti hashwa ka tamasa Holi, ka Northeast Frontier (NF) Railway ka la pynbna ban pyntreikam ïa ki 14 tylli ki rel kyrpang na ka bynta ka jinglehkmen Holi, kaba la pyndap shuh sa 128 tylli ki jingleit jingwan ha kylleng ka bynta jong ka.
Kane ka jingthmu ka long ban pynthikna ïa ka jingleit jingwan kaba suk bad kaba khlem jingeh ha kawei na ki por ba bunkam tam ha ka leit ka wan ha kane ka snem.
Katkum ka jingïathuh jong ki heh jong ka NF Railway, khatwei tylli ki rel ba kyrpang ki la treikam naduh u bnai Rymphang, 2026. Sa lai tylli ki rel ba kyrpang kin treikam ha ki lynti ba kongsan kiba pynïasoh ïa ka Tata Nagar-Katihar, Agartala-Guwahati bad Kishanganj-Lalkuan, kaba pynbha shibun ïa ka jingïadei bad ka thaiñ Shatei-Mihngi.
Ka Tata Nagar-Katihar Special (Train No. 08181) kan ïaid man la ka lah sngi U Blei naduh ka 2 tarik, Lber, haduh ka 30 tarik Lber, bad kan mih na Tata Nagar ha ka por 1:00 nohphai sngi bad kan poi sha Katihar ha ka por 7:30 mynstep ha ka sngi kaba bud. Ka Return Service (08182) kan ïaid man la ka sngi Ba-ar naduh ka 3 tarik, Lber haduh ka 31 tarik, Lber, bad kan mih na Katihar ha ka por 10:30 baje mynstep bad kan poi ha Tata Nagar ha ka por 4:30 baje mynstep ha ka sngi kaba bud. Baroh ar tylli ki jingshakri kin pyndep san tylli ki jingleit kawei kawei.
Kumjuh ruh ka Agartala-Guwahati Special (05628) kan ïaid man la ka sngi Palei naduh ka 5 tarik u Lber haduh ka 26 tarik u Lber, kan mih na Agartala ha ka por 7:00 janmiet bad kan poi sha Guwahati ha ka por 9:00 mynstep ha ka sngi kaba bud.
Kane ka rel kaba wanphai pat ka number 05627 kan ïaid man la ka sngi Thohdieng naduh ka 6 tarik Lber haduh ka 27 tarik Lber, kan mih na Guwahati ha ka por 1:15 nohphai sngi bad kan poi sha Agartala ha ka por 4:25 mynstep ha ka sngi kaba bud. Kawei pa kawei ka liang kan ïaid saw tylli ki jingleit.
Ha ka lynti Kishanganj sha Lalkuan, ka Train No. 05741 kan ïaid man la ka sngi Palei naduh ka 5 tarik Lber haduh ka 26 tarik Lber, bad kan mih na Kishanganj ha ka por 8:30 mynstep bad kan poi sha Lalkuan ha ka por 3:40 janmiet ha ka sngi kaba bud. Ka Return Train 05742 kan mih na Lalkuan manla ka sngi Thohdieng naduh ka 6 tarik Lber haduh ka 27 tarik Lber ha ka por 8:40 janmiet, bad kan poi ha Kishanganj ha ka por 2:00 mynstep jong ka Sngi U Blei. Baroh ar tylli ki jingshakri kin pyndep ruh saw tylli ki jingleit kawei kawei.
Nalor ka jingpynïaid ïa ki rel ba kyrpang, ka NF Railway ka la pynbeit kyrpang, kynthup ïa ka jingpynkhlaiñ ïa ka jingpahara, ka jingpynïaid ïa ki paidbah ha ka rukom kaba ryntih, ki jaka ai jingïarap ba kham bun, ka jingpynbun ïa ki nongtrei ha madan bad ka jingpynthikna ïa ka jingdon jong ka um dih kaba khuid ban pynïaid ïa ka jingkiew jong ka jingwan ki nongleit nongwan.
La bthah ïa ki nongleit nongwan ba kin peit ïa ki por, ki jaka sangeh bad ki por ha ka Official Website jong ka Indian Railway Catering and Tourism Corporation (IRCTC) lane ha ki Railway Inquiry Counter shwa ban leit jingleit.
Ki bor pynïaid ki la kyntu ruh ïa ki nongleit jingleit ba kin Book tiket tang lyngba ki lad ba la ai bor.
